Արցախն Ադրբեջանի կազմի մեջ դնելու ցանկացած փորձ հղի է պատերազմով և ցեղասպանությամբ

Արցախը դեմ չէ Հայաստանի և Ադրբեջանի հարաբերությունների կարգավորմանը, սակայն Արցախի ճանաչումն Ադրբեջանի կազմում անընդունելի է: Այս մասին խորհրդարանում կայացած հանդիպմանը հաջորդած ճեպազրույցում ասել է Արցախի արտաքին գործերի նախարար Դավիթ Բաբայանը։

Նրա խոսքով, Երեւանում տեղի ունեցած հանդիպումների ընթացքում տրվել են բացատրություններ, ստացվել հավաստիացումներ, որ Հայաստանը մտադիր չէ լքել Արցախն ու ճանաչել այն Ադրբեջանի կազմում։ «Հիմա մենք պետք է ճկուն քաղաքականություն վարենք»,- ասաց Բաբայանը։

Նա նշեց, որ պատվիրակությունը դեռ մտադիր է հանդիպել վարչապետի հետ, ով, լինելով բանակցությունների անմիջական մասնակից, նույնպես պետք է հստակեցնի իր դիրքորոշումը Արցախի հարցում։

«Մենք արտահայտել ենք մեր դիրքորոշումը՝ Արցախն Ադրբեջանի կազմի մեջ ներքաշելու ցանկացած փորձ հղի է երկու հնարավոր հետևանքով՝ կա՛մ պատերազմ, արյունահեղություն և ցեղասպանություն, կա՛մ Արցախից հայերի հեռացում»,- ասել է նախարարը։ Նա հավելել է, որ եթե արևմտյան երկրների կողմից ներկայացված այսպես կոչված «ժողովրդավարության բաստիոնները» նույնպես Արցախը համարեն Ադրբեջանի մաս, նրանք կդառնան ցեղասպանության մեղսակից։

Միաժամանակ Բաբայանը նշել է, որ Արցախը երբեք դեմ չի եղել Բաքվի հետ երկխոսությանը, սակայն այդ բանակցությունները «չպետք է տեղի ունենան միջազգայնորեն ճանաչված հարթակից դուրս», և այդպիսին է ԵԱՀԿ Մինսկի խումբը։

«Ադրբեջանն ասում է, որ որպես կողմ չի բանակցելու։ Եվ մենք հայտարարում ենք՝ մենք պետք է վերականգնենք ձևաչափը, որպեսզի բանակցենք։ Բայց եթե ինչ-որ մեկը կարծում է, որ բանակցություններն այնպիսի երանգ են ստանալու, որ ինչ-որ էթնիկ խումբ՝ ի դեմս Արցախի, կգնա և կասի. «Ներողություն, Ադրբեջան, մենք սխալվեցինք, ներողություն ենք խնդրում, մեզ էլի ներառեք ձեր կազմում», ապա դա չի լինի։ Հայաստանի իշխանությունները դա հասկանում են, չեն կարող չհասկանալ, քանի որ սա Արցախի ժողովրդի հավաքական կարծիքն է»,- ասաց Բաբայանը։