Եվրոպական խորհրդի նախագահ Շառլ Միշելը հանդես է եկել նոր հայտարարությամբ։
Դրանում նշվում է, որ մայիսի 22-ի բրյուսելյան հանդիպման ընթացքում Նիկոլ Փաշինյանի և Իլհամ Ալիևի հետ քննարկվել է հաղորդակցությունների և տարածաշրջանի ապաշրջափակման հարցը և կողմերը հաստատել են, որ չկան արտատարածքային պահանջներ ապագա տրանսպորտային ենթակառուցվածքների վերաբերյալ:
Ըստ այդմ, հայտարարության մեջ նշվում է, որ հակառակի վերաբերյալ շահարկումները ափսոսանք են հարուցում։
"Հայաստանի և Ադրբեջանի միջև նախորդ օրերի լարվածության համատեքստում վերահաստատում ենք Եվրամիության հանձնառությունը՝ խորացնել իր համագործակցությունը երկու երկրների հետ հանուն անվտանգ, կայուն, խաղաղ և բարգավաճ Հարավային Կովկաս ունենալու համար՝ ի շահ տարածաշրջանի բոլոր բնակիչների: Ողջունում ենք սահմանային հանձնաժողովների մայիսի 24-ի պատմական հանդիպման կարևորությունը Հայաստանի և Ադրբեջանի միջև սահմանի երկայնքով կայունության և անվտանգության ապահովմանն ուղղված սահմանազատումից առաջ։
Հայաստանի և Ադրբեջանի միջև հարաբերությունների կայուն կարգավորման համար կարևոր է լուծել բոլոր չլուծված հարցերը, ներառյալ՝ առաջ մղելով ապագա խաղաղության պայմանագրի շուրջ քննարկումները և անդրադառնալով հակամարտության արմատներին։
Բոլոր առանցքային խնդիրները, որոնք հանգեցրել են Լեռնային Ղարաբաղի առաջին պատերազմին, ինչպես նաև 2020 թվականին ռազմական գործողությունների վերսկսմանը, պետք է լուծվեն շահագրգիռ բոլոր կողմերի կողմից՝ պայմաններ ստեղծելով տևական և արդարացի խաղաղության համար: Այս համատեքստում կիրառվող տերմինաբանությունը բավականին զգայուն է",- ասված է հայտարարության մեջ։
Նաև նշվում է, որ նախագահ Միշելի՝ մայիսի 22-ի հանդիպման արդյունքներով հայտարարությունը չպետք է մեկնաբանվի որպես աջակցություն՝ քննարկումների որևէ կանխորոշված ելքի։
"Խիստ կարևոր է, որ բոլոր խնդիրները համընդգրկուն հասցեագրում ունենան։ Սա ներառում է ամբողջ բնակչության իրավունքներն ու անվտանգությունը: Մայիսի 22-ին հատուկ քննարկվել է տարածաշրջանում տնտեսական կապերի և տրանսպորտային հաղորդակցությունների բացման հարցը և այս համատեքստում բոլոր կողմերը հաստատել են, որ չկան արտատարածքային պահանջներ ապագա տրանսպորտային ենթակառուցվածքների վերաբերյալ։ Հակառակի վերաբերյալ շահարկումները ափսոսանք են հարուցում»,- շեշտվում է ԵԽ նախագահի հայտարարության մեջ։
Անդրադարձ է կատարվում նաև երկու երկրների բնակչությանը խաղաղության նախապատրաստելու անհրաժեշտությանը և այս իմաստով հրապարակային հռետորաբանության կարևոր դերին։
Միշելը, մասնավորապես, ողջունել է պաշտոնական Երևանի և Բաքվի բանակցությունները շարունակելու պատրաստակամությունը և ընդգծել, որ Եվրամիությունը պատրաստ է աջակցել փոխադարձ վստահության ամրապնդման գործողություններին: Միշելի հայտարարության մեջ տեղեկացվում է, որ ԵՄ հատուկ ներկայացուցիչ Տոյվո Կլաարը առաջիկա օրերին կժամանի տարածաշրջան։
