ՌԴ դատախազությունը կարող է հանդես գալ «Պերմյակովի գործով» որպես մեղադրող կողմ

Ռուսաստանի Դաշնության դատախազությանը կարող է որպես մեղադրող կողմ հանդես գալ Գյումրիում Ավետիսյանների ընտանիքի 7 անդամների սպանության գործով:

Նման հայտարարություն է արել Ռուսաստանի գլխավոր զինվորական դատախազ Սերգեյ Ֆրեդինսկին, հաղորդում է «Ինտերֆաքս» գործակալությունը:

«Ես կարծում եմ՝ այո»,- ասել է գլխավոր զինվորական դատախազ Սերգեյ Ֆրեդինսկին՝ պատասխանելով լրագրողների համապատասխան հարցին: Նա, սակայն, ընդգծել է, որ այդ մասին խոսակցություն դեռ չի եղել: Նրա խոսքով՝ Զինվորական դատախազությունը պատրաստ է միանալ գործընթացին:

Հունվարի 12-ին Ավետիսյանների ընտանիքի 7 անդամների սպանության համար մեղադրվում է Գյումրիի 102-րդ ռուսական ռազմաբազայի զինծառայող Վալերի Պերմյակովը։ Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս և հանձնել 102-րդ ռուսական բազայի հրամանատարությանը:

Գործի քննությունը գտնվում է ռուսական կողմի իրավասության տակ, ինչն առաջացրել է դժգոհություններ Հայաստանի հասարակական և քաղաքական շրջանակներում: Ողբերգական սպանությունը ստացավ մեծ հասարակական հնչեղություն: Գյումրիում և Երևանում միաժամանակ անցկացվեցին մի քանի մասսայական բողոքի ակցիաներ, որի մասնակիցները պահանջում էին սպանության մեջ մեղադրվող Պերմյակովին հանձնել Հայաստանի արդարադատությանը:

Հայաստանի գլխավոր դատախազ Գևորգ Կոստանյանը փետրվարի 3-ին դիմեց Ռուսաստանի իր գորընկերոջը՝ Գյումրիում մեկ ընտանիքի 7 անդամների դաժան սպանության դեպքով «հարուցած քրեական գործի վարույթը ՀՀ իրավապահ մարմիններին փոխանցելու վերաբերյալ միջնորդությամբ»:

Ռուսական կողմի՝ Հայաստանի գլխավոր դատախազի միջնորդության վերաբերյալ դիրքորոշման մասին դեռ տեղեկատվություն չի հայտնվում: Ավելի վաղ Ռուսաստանի նախագահի մամլո խոսնակ Դմիտրի Պեսկովը, մեկնաբանելով Գյումրիում տեղի ունեցածը, հայտարարել էր, որ «Պերմայկովի գործը» պետք է քննի ռուսական դատարանը: