Արա Այվազյան. «3+3» ձևաչափը կարող է դուրս մղել ԵԱՀԿ Մինսկի խմբի համանախագահությանը

Ցավոք, մենք Թուրքիայի դրական քայլերը չենք տեսնում։ Այս մասին այսօր լրագրողների հետ զրույցում ասաց ՀՀ նախկին արտգործնախարար Արա Այվազյանը։

Նրա խոսքով՝ Հայաստանը միշտ ձգտել է Թուրքիայի հետ առանց նախապայմանների հարաբերությունների կարգավորման։ Որոշակի ժամանակահատվածում հարաբերությունների կարգավորման գործընթացը փոքր-ինչ ակտիվացել է, սակայն երկարատեւ երկխոսությունը բնավ չի եղել, հիշեցրել է նա։

Խոսելով հատուկ դեսպանորդների ուղարկման հեռանկարի մասին՝ Այվազյանը նշել է. «Բնականաբար, անհրաժեշտ է նաեւ տարբերել սովորական պայմանները ներկայիս պայմաններից, հատկապես 44-օրյա պատերազմի մեջ Թուրքիայի անմիջական ներգրավվածության եւ Անկարայի կողմից հնչեցվող նոր նախապայմանների լույսի ներքո։ Հաշվի առնելով վերոնշյալը՝ չափազանց կարեւոր է, որ ԱԳՆ-ում մեր գործընկերները հաշվի առնեն եւ ճիշտ գնահատեն իրավիճակը, հասկանան, թե ինչ օրակարգով են վարելու այդ բանակցությունները»։

Նա նշել է, որ ԱԳՆ մամուլի խոսնակը հայտարարել է գործընթացն առանց նախապայմանների սկսելու մասին, սակայն, ցավոք, Անկարայի որեւէ դրական քայլ չի նկատվում: «Թուրքիան միայն նոր նախապայմաններ է առաջ քաշում, ընդունում է, մեղմ ասած, բարիդրացիական հարաբերություններին բնորոշ դիրքորոշում։ Ուստի ես չափազանց զարմացած եմ եւ որոշակի կասկածներ ունեմ "3+3" ձեւաչափի իրական նպատակների վերաբերյալ», - հայտարարել է նախկին նախարարը։

«Պաշտոնական Երևանը հայտարարում է, որ "3+3" ձևաչափը չպետք է կրկնօրինակի այն հարցերը, որոնք արդեն քննարկվում են այլ ձևաչափերում։ Բայց մեզ շատ լավ հայտնի են Բաքվի և Անկարայի հայտարարություններն ու դիրքորոշումը։ Ես մտավախություն ունեմ, որ այդ ձևաչափը կարող է չեզոքացնել կամ դուրս մղել ԵԱՀԿ Մինսկի խմբի համանախագահության ձևաչափը։ Վստահ եմ, որ ԱԳՆ-ում մեր գործընկերներն այս ամենը հաշվարկում են», - եզրափակել է նա։