Սիրիայի նախագահ Բաշար ալ Ասադը Ռուսաստանի փոխվարչապետ Դմիտրի Ռոգոզինի հետ հանդիպման ժամանակ «դավաճան» է անվանել Սիրիայի հյուսիսում կռվող զինված քրդական ջոկատներին՝ շեշտելով, որ նրանք աջակցություն են ստանում ԱՄՆ-ից: Քննարկման ժամանակ շեշտվել է հատկապես Սիրիայում գործող քրդական ազգային զինված ջոկատների (YPG) և «Սիրիայի դեմոկրատական ուժեր» (SDF) խմբավորման անունները: Սիրիայի առաջնորդն ընդգծել է, որ ոչ միայն քրդերը, այլև ԱՄՆ-ի կողմից ուղղորդվող բոլոր ուժերը Սիրիայի համար դավաճաններ են: Ինչպես փոխանցում է քրդական Rudaw գործակալությունը, Ասադի հայտարարությանն ի պատասխան «Սիրիայի դեմոկրատական ուժեր»-ը պատասխան հայտարարություն է տարածել, որտեղ նշել է, թե բոլորովին չեն զարմացել նախագահի նման հայտարարությունից և մեղադրել են նրան ժողովրդի մեջ խռովություն տարածելու համար: «Իսկական դավաճանը քո կառավարությունն է», - ասվում է պատասխան հայտարարության մեջ:
