Իրանի իշխանություններն ազատ են արձակել ձերբակալված 440 ցուցարարի

Իրանի իշխանություններն ազատ են արձակել 440 մարդու, ովքեր ձերբակալվել էին հակակառավարական բողոքի ակցիաների ժամանակ։ Այս մասին հայտնում է Reuters գործակալությունը՝ հղում անելով Իրանի դատական պաշտոնյաներին։

Գործակալությունը հիշեցնում է, որ դեկտեմբերի վերջին սկսված ցույցերն ընդգրկել էին ավելի քան 80 իրանական քաղաքներ և հանգեցրել 25 զոհի։

Սկզբում ցույցերն ուղղված են եղել Թեհրանի տնտեսական քաղաքականության և գնաճի դեմ, սակայն այնուհետև ակցիայի մասնակիցները սկսել են դժգոհություն արտահայտել՝ ուղղված կառավարության և երկրի հոգևոր ղեկավարության դեմ։

Իրանի դատական պաշտոնյաները պաշտոնապես հայտարարել էին ողջ երկրում մոտ 1000 մարդու ձերբակալության մասին, սակայն որոշ տվյալներով՝ նրանց թիվը կարող է հասնել 3700-ի։ Մի քանի մարդ մահացել է ազատազրկման վայրերում, ինչի հետ կապված իրավապաշտպաններն անկախ հետաքննությունների անցկացման կոչ են արել։ Իրանի իշխանությունները հաստատել են միայն 2 ձերբակալվածների մահը՝ հայտարարելով, որ նրանք ինքնասպանություն են գործել։

Թեհրանի դատախազ Աբաս Ջաֆարի Դոլաթաբադին հայտարարել է, որ ձերբակալվածների մեծ մասը եղել են 18-35 տարեկան երիտասարդներ՝ աղքատ ընտանիքներից։