ՀՀ պաշտպանության նախարարի առաջին տեղակալ Դավիթ Տոնոյանի գլխավորած պատվիրակությունը Լոնդոնում մասնակցել է հայ-բրիտանական երկրորդ ռազմաքաղաքական խորհրդակցություններին: Քննարկումների արդյունքում Դավիթ Տոնոյանը եւ բրիտանական պատվիրակության ղեկավար, Միացյալ Թագավորության միջազգային անվտանգային քաղաքականության տնօրեն Նիք Գըրը ստորագրել են պաշտպանական բնագավառում 2016-2017 թթ. համագործակցության պլանը: ՀՀ ՊՆ լրատվական ծառայության փոխանցմամբ՝ այն ընդգրկում է համագործակցության մոտ երկու տասնյակ ուղղություն, որոնք հիմնականում առնչվում են ռազմական կրթությանը եւ վերապատրաստմանը, տարբեր ոլորտներում փորձի փոխանակմանը եւ այլն: ՀՀ Սահմանադրության փոփոխությունների ընդունումից հետո ՀՀ պաշտպանությանը եւ անվտանգությանը վերաբերող օրենսդրության վերանայման նպատակով Մեծ Բրիտանիայի կողմից նախատեսվում է խորհրդատվական աջակցություն: Հունվարի 14-ին տեղի ունեցած խորհրդակցությունների շրջանակում ՀՀ ՊՆ պատվիրակությունը հանդիպել է նաեւ ՄԹ ԱԳՆ Արեւելյան Եվրոպայի եւ Կենտրոնական Ասիայի հարցերով դիրեկտորատի տնօրեն Մայքլ Թաթհամի հետ, քննարկել երկկողմ պաշտպանական համագործակցությանը, ԼՂ հակամարտությանն առնչվող հարցեր:
