Հայոց ցեղասպանությունը պետք է քննարկվի ոչ թե օտար երկրների, այլ հենց Թուրքիայի Մեջլիսում
Էրդողանի հիմնած «Արդարություն և զարգացում» կուսակցության իշխանության գալու տարիներին Թուրքիայի հասարակությունը կարևոր քայլեր կատարեց անցյալի սխալների, կատարված մեղքերի ու հանցանքների մասին խոսելու հարցում: Այս առաջարկն ընդունելը նշանակում է վերադառնալ հին ժամանակներ: Այս ամենի նպատակն ընդդիմության ձայնը կտրելն ու նախագահական պալատից եկող հրամաններն ավելի արագ օրինականացնելն է: Այս մասին Ստամբուլի «Ակօս» պարբերականի հետ զրույցում ասել է Թուրքիայի խորհրդարանի հայազգի ընդդիմադիր պատգամավոր Կարո Փայլանը՝ մեկնաբանելով խորհրդարանում Հայոց ցեղասպանության ու քրդաբնակ նահանգների մասին խոսելիս «Քուրդիստան» անվամբ հիշատակումների դեպքում պատգամավորներին դրամական տույժի ենթարկելու առաջարկը:
Նրա խոսքով, Հայոց ցեղասպանությունը պետք է քննարկվի ոչ թե օտար երկրների խորհրդարաններում, այլ հենց Թուրքիայի Մեջլիսում, քանի որ այդ հանցանքները տեղի են ունեցել Թուրքիայում և պետք է քննարկվեն Մեջլիսում.
«Մեր ցավերն այսօր Մեջլիսում չեն քննարկվում, այդ իսկ պատճառով դառնում են այլ երկրների խորհրդարանների քննարկման առարկան, և եթե այս առաջարկն էլ ընդունվի` սա այսպես էլ կշարունակվի: Դրամական տույժ կիրառելը ոչ միայն ամոթալի է, այլև անձնական վիրավորանք է հենց պատգամավորի հասցեին», -ընդգծել է նա:
Փայլանը նաև ասել է, որ իր կուսակցությոան հետ միասին պայքարելու են սույն առաջարկի չընդունվելու համար: Բացի այս, տեղեկացրել է, որ խորհրդարանի մյուս ընդդիմադիր ուժը` ժողովրդահանրապետականները, նույնպես դեմ են դրան և առաջարկների այս փաթեթի դեմ պայքարելու են քրդամետների հետ միասին, ինչպես ավելի վաղ խոսվել է թուրքական մամուլում:
VERELQ-ն ավելի վաղ տեղեկացրել էր, որ Թուրքիայի խորհրդարանի պատգամավորներն այսուհետ կարող են ստիպված լինել տուգանք վճարել Հայոց ցեղասպանության մասին խոսելու համար: Թուրքիայի իշխող «Արդարություն և զարգացում» կուսակցության և կոալիցիոն «Ազգային շարժում» կուսակցության կողմից պատրաստված և խորհրդարանում պատգամավորների վարքի, նիստերի կանոնակարգի ու արտաքին տեսքի հետ կապված փոփոխությունների 18 կետանոց փաթեթում տեղ է գտել նաև «Թուրք ժողովրդի պատմությունն ու Թուրքիայում ապրող ժողովուրդների ընդհանուր անցյալը վիրավորելու և մեղադրանքներ ներկայացնելու» պարագայում պատգամավորների՝ նիստերից ժամանակավոր հեռացման ու 12 հազ. թուրքական լիրայի չափով աշխատավարձից պահման մասին առաջարկը։
