Ջելպկե. Գերմանիան ոչ միայն պետք է ճանաչի Հայոց Ցեղասպանությունը, այլև մեղքն այդ ոճրագործության մեջ
«Մենք երկար ժամանակ է պայքարում ենք, որպեսզի Գերմանիայի Բունդեսթագը Հայոց Ցեղասպանությունը ճանաչող բանաձև ընդունի: Բայց ինձ համար անձամբ շատ կարևոր է, որպեսզի Գերմանիան հասկանա և գիտակցի, որ այդ ժամանակ մասնակից է եղել այդ ոճրագործություններին»,- VERELQ-ի հետ զրույցում ասաց Գերմանիայի Բունդեսթագի պատգամավոր Ուլլա Ջելպկեն:
Նշենք, որ գերմանացի պատգամավորը գործընկերների հետ միասին այսօր Ազգային Ժողովում հանդիպումներ ունեցավ ԱԺ խմբակցությունների ներկայացուցիչների, ինչպես նաև ԱԺ Արտաքին հարաբերությունների մշտական հանձնաժողովի նախագահ Արտակ Զաքարյանի հետ, ում հավաստիացրեց, որ հունիսի սկզբին Բունդես`ագը Հայոց Ցեղասպանությունը ճանաչող բանաձևը երկար պայքարից հետո վերջապես կընդունի:
Գերմանացի խորհրդարանականը նշեց, որ Բունդեսթագը, այդուհանդերձ, կընդունի մի բանաձևը, որը չի գոհացնի իրեն հենց նշված պատճառով` դրանում խոսք չի լինի, որ Գերմանիան ճանաչում է նաև իր մեղքը այդ ոճրագործության մեջ: Մինչդեռ իր ցանկությունն է, որպեսզի բանաձևում տեղ գտնի հստակ այդ ձևակերպումը, որ Գերմանիան պատասխանատու է հայերի ցեղասպանության ու տարհանման համար:
Ի դեպ, վաղը գերմանացի պատգամավորները կմեկնեն Արցախ, որպեսզի տեղում ծանոթանան առկա իրավիճակին, տեղեկատվություն հավաքագրեն և այն, վերադառնալուն պես, ներկայացնեն իրենց գործընկերներին: Տիկին Ջելպկեն ընդգծեց` Գերմանիայում քիչ կամ գրեթե ընդհանրապես տեղեկացված չեն Ղարաբաղյան հակամարտությունից և այդ բացը հարկավոր է լրացնել:
Հարցին` մտավախություն չունի ՞, որ այցի պխատճառով կհայտնվի Ադրբեջանի «սև ցուցակում», գերմանացի պատգամավորը հստակ շեշտեց` ոչ. «Իմ առաքելությունն է պայքարել խաղաղության ու երկխոսության համար: Այլ բան ինձ չի մտահոգում»,- հավելեց նա:
