Վաղը վարչապետի պաշտոնակատար Կարեն Կարապետյանի եւ համաժողովրդական շարժման առաջնորդ Նիկոլ Փաշինյանի միջեւ նախատեսված բանակցությունները տեղի չեն ունենա: Այս մասին տեղեկացնում է «Քաղաքացիական պայմանագիր» կուսակցության մամուլի խոսնակ Տիգրան Ավինյանը: «Բանակցությունները կարող են տեղի ունենալ միայն այն կետերի շուրջ, որոնք հայտարարվել էին՝ դա էր իշխանության խաղաղ փոխանցման օրակարգը, ԱԺ արտահերթ ընտրությունները: ՀՀԿ-ն չի կարող լինել ժամանակավոր կառավարության առաջին դեմքը: Միայն այս օրակարգի շուրջ կարող են լինել բանակցություններ: Որևէ այլ օրակարգ քննարկելի չէ մեզ համար»,- ասաց Ավինյանը: Նշենք, որ ըստ VERELQ-ին հասած տեղեկությունների այժմ ՀՀԿ-ի առաջնորդ Սերժ Սարգսյանը կուսակցության գործադիր մարմնի նիստ է հրավիրել: Հավանաբար քննարկվում է հենց Փաշինյանի հետ ապրիլի 25-ի բանակցությունների կամ նրա ղեկավարած շարժման ապագա գործողությունների խնդիրը: Ավելի վաղ Փաշինյանը հայտարարել էր, որ մինչեւ ՀՀԿ-ի հետ բանակցությունների եւ դաց արդյունաքում իշխանության ամբողջական փոխանցման ավարտը Հայաստանում պետք է շարունակվեն ընդդիմության հանրահավաքները:
