Հունիս 9-ին «Ելք» և «Ծառուկյան» կուսակցությունների դաշինք խմբակցություններն առաջին անգամ 6-րդ գումարման Ազգային Ժողովում իրացրել են պատգամավորների մեկ հինգերորդի կողմից Սահմանադրական դատարանում իրավական ակտի սահմանադրականության հարցի վիճարկման լիազորությունը: Վանաձորի ճգնաժամն է միավորել խմբակցություններին: Այս մասին տեղեկանում ենք «Ելք» խմբակցության անդամ Էդմոն Մարուքյանի Facebook-յան էջից: Դիմելով ՍԴ խմբակցություններն ակնկալում են ելք գտնել Վանաձորի ՏԻՄ ընտրություններից հետո մանդատագողության արդյունքում ստեղծված քաղաքական ճգնաժամից.«ՀՀ Ազգային ժողովի 26 պատգամավորներ, ՀՀ Սահմանադրական դատարանից պահանջում են Սահմանադրությանը հակասող և անվավեր ճանաչել ՀՀ «Տեղական ինքնակառավարման» մասին օրենքի այն դրույթը, որով առաջնորդվելով ավագանու ՀՀԿ և ՀՅԴ խմբացկությունների ներկայացուցիչները սույն թվականի մարտ ամսից սկսած լինելով փոքրամասնություն, չունենալով քվորում, գումարում են նիստեր ու կայացնում որոշումներ։ Ազգային ժողովի «ԵԼՔ» և «Ծառուկյան» կուսակցությունների դաշինք խմբակցությունները վիճարկում են նաև այս որոշումների սահմանադրականությունը: Հատկանշական է, որ Սահմանադրական դատարանում ավագանու որոշումների սահմանադրականության վիճարկումը Հայաստանի նորագույն պատմության մեջ առաջին դեպքն է»,- ասված է Մարուքյանի հայտարարության մեջ: Հիշեցնենք, Վանաձորի ավագանու ընտրություններից հետո ավագանու կազմ ընտրված «Լուսավոր Հայաստան», «Բարգավաճ Հայաստան» և «Հայկական վերածնունդ» կուսակցությունները համաձայնության էին եկել միասնական սատարելու Քրիստ Մարուքյանի թեկնածությունը: Ըստ այդմ՝ Մարուքյանը պետք է ստանար 18 ձայն, սակայն նրա օգտին փաստացի քվեարկեց 14 ավագանու անդամ, ինչից հետո սկսվեց այսպես կոչված վհուկների որսը՝ ավագանու խմբակցությունները փորձում էին ճշտել, թե ովքեր են այն չորս ավագանիները, որոնք դավաճանելով նախնական համաձայնությունը՝ հնարավորություն տվեցին ՀՀԿ-ական Մամիկոն Ասլանյանին դառնալ Վանաձորի քաղաքապետ: Մի քանի ամիս է ընդդիմությունը՝ «Լուսավոր Հայաստան», «Բարգավաճ Հայաստան» և «Հայկական վերածնունդ» բոյկոտում է Վանաձորի ավագանու նիստերը: