Թուրքիայի նախագահ Ռեջեփ Թայիփ Էրդողանը դեռևս տարիներ առաջ է պլանավորել հեղաշրջման այդ փորձը: Այս մասին գերմանական Die Zeit-ին տված հարցազրույցում ասել է Թուրքիայում հեղաշրջման փորձի կազմակերպման համար մեղադրվող ամերիկաբնակ թուրք կրոնական քարոզիչ Ֆեթուլլահ Գյուլենը: Նա նշել է, որ հեղաշրջման փորձի պատրվակով Էրդողանը կադրային զտումներ է իրականացնում, որպեսզի ուժեղացնի իր իշխանությունը: Գյուլենը խոսել է նաև այն մասին, թե ինչպես են վատթարացել իր և Էրդողանի հարաբերությունները: Նա ասել է, որ Էրդողանը սպասում էր, որ իրենք պետք է նրան համայն աշխարհի մահմեդականների առաջնորդ հայտարարեն և համաշխարհային մակարդակով պետք է աշխատեն այդ ուղղությամբ: Սակայն երբ դա տեղի չի ունեցել, Էրդողանը սկսել է գործել իրենց դեմ: Հիշեցնենք, հուլիսի 15-ին Թուրքիայում տեղի է ունեցել ռազմական հեղաշրջման փորձ, որին հաջորդել են ձերբակալությունները երկրի զինված ուժերում և այլ կառույցներում: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» կրոնական շարժման հիմնադիր և իր հակառակորդ Ֆեթուլլահ Գյուլենին, որը բնակվում է ԱՄՆ Փենսիլվանիա նահանգում: Էրդողանը պահանջել է նաև ԱՄՆ-ից Գյուլենի արտահանձնում:
