Խոշոր գործարար Սամվել Մայրապետյանը երկու ամսով կալանավորվել է

Խոշոր գործարար Սամվել Մայրապետյանը երկու ամսով կալանավորվել է: Այս մասին մեր հարցին ի պատասխան ասաց նրա պաշտպան Կարեն Բատիկյանը:

Վերջինս դատական նիստից հետո հրաժարվել է պատասխանել լրագրողների հարցերին, արագ նստել մեքենան եւ հեռացել:

Նախաքննական մարմինը նրան կալանավորելու միջնորդություն էր ներկայացրել դատարան: Սամվել Մայրապետյանը նույնպես դատարան էր բերվել՝ առավոտյան ժամը 11:00-ի սահմաններում:

Նա մեղադրվում է ՀՀ ՔՕ 38-311 հոդվածի հատկանիշներով (կաշառք ստանալուն օժանդակելը): Առաջադրված մեղադրանքում Մայրապետյանն իրեն մեղավոր չի ճանաչում:

ՀՀ երկրորդ նախագահ Ռոբերտ Քոչարյանի մերձավոր համարվող Սամվել Մայրապետյանը ձերբակալվել է հոկտեմբերի 6-ին: ՀՔԾ-ն մինչեւ այսօր գաղտնի էր պահում, թե ինչ կասկածանք է խոշոր գործարարին առաջադրված: Նրա պաշտպանները գործում քաղաքական ենթատեքստ չեն տեսնում: