ԱԱԾ նախկին տնօրեն Արթուր Վանեցյանի դեմ ցուցմունքի գործով ծաղկի շուկայի աշխատակից Կարեն Ղազարյանի մոտ հայտնաբերվել են վնասվածքներ: Այս մասին հայտնում է Ղազարյանի պաշտպանությունն իրականացնող ընկերության ղեկավար Արսեն Բաբայանը: Օրերս Վազգեն Սարգսյանի անվան մարզադաշտին հարակից ծաղկի շուկայից բռնությամբ ոստիկանություն տեղափոխված Կարեն Ղազարյանը դեպքից հետո բուժօգնության է դիմել «Նաիրի» բժշկական կենտրոն ու ենթարկվել հետազոտության: Ղազարյանըի մոտ ախտորոշվել են «պարանոցի աջ և ձախ կողմնային, աջ և ձախ ճաճանչ-դաստակային հոդերի, գոտկային և ձախ սրունք-թաթային հոդի շրջանների քերծված վերքեր»։ Ավելի վաղ հայտնի էր դարձել, որ ՀՔԾ–ն ևս դատաբժշկի ուղեգիր է տվել Ղազարյանին, սակայն փորձաքննության եզրակացությունը դեռ չի ստացվել։ Հիշեցնենք, ՀՔԾ-ն Կարեն Ղազարյանի ներկայացրած հաղորդումը ընդունել է վարույթ, նյութեր են նախապատրաստվում: Հոկտեմբերի 17-ին Հրապարակ-ը հայտնել էր, որ առավոտյան Ոստիկանության վեցերորդ վարչությունը Վազգեն Սարգսյանի անվան մարզադաշտին հարակից ծաղկի շուկայի տարածքում «զախվատ օպերացիա» է իրականացրել՝ բերման ենթարկելով մի խումբ մարդկանց։ Աղբյուրի համաձայն՝ նման ռեպրեսիվ մեթոդներով փորձում են «գործ սարքել» ԱԱԾ նախկին տնօրեն Արթուր Վանեցյանի դեմ: 6-րդ վարչություն էին տարել շուկայի աշխատակիցներից Կարեն Ղազարյանին եւ ստիպել, որ ասի, թե ծաղկավաճառներից գումարներ է շորթել։ Նաեւ պարտադրել են գրել, թե «ով է իր կռիշը», ում է տվել շորթած գումարները: Աշխատակիցը հրաժարվել էր կեղծ հայտարարություններ անել, որից հետո նրա նկատմամբ ֆիզիկական բռնություն էր գործադրվել՝ հարվածել են կողերին, ոտքերին:
