Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի հանդիպումը Բրատիսլավայում տևել է երեքուկես ժամ, հաղորդում է ռուսական ՏԱՍՍ գործակալությունը՝ վկայակոչելով Ադրբեջանի ԱԳՆ-ին։ Հայաստանի ԱԳՆ-ն առայժմ հաղորդագրություն չի տարածել։ Արտգործնախարարները պայմանավորվել են կրկին հանդիպել հաջորդ տարվա սկզբին։ Առայժմ հայտնի չէ, թե արդյոք որևէ հայտարարություն ընդունվել է հանդիպման արդյունքներով։ Հանդիպումը տեղի է ունեցել Բրատիսլավայում ընթացող ԵԱՀԿ Նախարարների խորհրդի նիստի շրջանակում։ Հիշեցնենք, որ պաշտոնական Բաքուն ԵԱՀԿ նախարարների խորհրդի անդամներին է ներկայացրել Լեռնային Ղարաբաղի հակամարտության կարգավորման վերաբերյալ իր դիրքորոշումը:
