Ural Airlines-ը բացատրել է՝ ինչու է հրաժարվել տարհանել Չինաստանից ԱՊՀ երկրների, այդ թվում՝ Հայաստանի քաղաքացիներին, որոնք այդ ընկերության տոմսեր ունեին: Ընկերությունում հայտարարել են, որ փետրվարից իրավունք ունեն Չինաստանից չարթերային չվերթներով տեղափոխել միայն ՌԴ քաղաքացիներին, հայտնում է ՌԻԱ Նովոստին՝ ավիաընկերության մամուլի ծառայությանը հղումով: «Կոմերսանտը» գրել էր, որ չինական Սիան-Սյանյան օդանավակայանում ավիաընկերության ներկայացուցիչները հրաժարվել են Եկատերինբուրգ տեղափոխել ԱՊՀ մոտ 70 քաղաքացու, որոնք այդ չվերթի տոմսեր ունեին: ՀՀ ԱԳՆ-ն ավելի վաղ հայտնել էր, որ ՀՀ քաղաքացիները չեն կարողացել մեկնել Չինաստանից, քանի որ նրանց գրանցումը ավիաուղիների չվերթին մերժվել էր, իսկ տոմսի գումարը՝ փոխհատուցվել: ՌԴ կառավարության կարգադրությամբ ընկերությունը 2020-ի փետրվարի 1-ից դադարեցրել է կանոնավոր չվերթները Չինաստան և հակառակ ուղղությամբ: Այդ օրվանից ավիաընկերությունը միայն չարթերային չվերթներ է իրականացնում: Դրանց իրականացման հայտը ներկայացվել էր Չինաստանի իշխանություններին՝ ըստ թույլտվության, ավիաընկերությունը կարող է փոխադրել միայն ՌԴ քաղաքացիներին:
