Հայաստանում ներդրվում է սոցիալական աջակցության քարտերի համակարգ

Ֆինանսական ծանր վիճակում հայտնված Հայաստանի քաղաքացիներին պետությունը կտրամադրի օգնության քարտ: Այս մասին այսօր՝ հունիսի 9-ին, խորհրդարանի արտահերթ նիստում հայտարարեց աշխատանքի և սոցիալական հարցերի փոխնախարար Աննա Ժամակոչյանը։

Նրա խոսքով, տրամադրվող ֆինանսական աջակցության չափը որոշվելու է պետության կողմից և կախված կլինի իրավիճակից և ծանր իրավիճակում հայտնված քաղաքացու հիմնական կարիքներին համապատասխան։ Այդ միջոցները կուղղվեն սննդի, հագուստի և առաջին անհրաժեշտության ապրանքների ապահովմանը։ Գումարը տատանվում է տարբեր սոցիալական խմբերի և իրավիճակների համար և կորոշվի կառավարության կողմից:

Ժամակոչյանի խոսքով, անհրաժեշտ են արագ արձագանքման մեխանիզմներ սոցիալական աջակցության նոր ծառայություններ ձևավորելու համար, որոնք իրավական հիմք կստեղծեն սոցիալական աջակցության ոլորտում ճկուն քաղաքականության համար։ Առաջարկվում է սահմանել նաև սոցիալական պաշտպանության հաստատության մեկ այլ տեսակ՝ փոքր համայնքային տներ, որոնք կոչված կլինեն բնակչությանը տրամադրել խնամքի ծառայություններ և բազմամասնագիտական ​​օգնություն։