Նախորդ շաբաթ Աշգաբադում տեղի ունեցած հանդիպումը և Ադրբեջանի, Թուրքիայի, Թուրքմենստանի և ԵՄ-ի միջև աշխատանքային խումբ ստեղծելու որոշումը մեծ քայլ է: Այդ մասին Trend-ին հայտնել է Ադրբեջանի էներգետիկայի նախարար Նատիգ Ալիևը: Նա նշել է, որ հանդիպման ամենագլխավոր արդյունքը ընդունված էներգետիկ հռչակագիրն է: Նախորդ շաբաթ Թուրքմենստանի մայրաքաղաք Աշգաբադում երեք երկրների և ԵՄ-ի նավթագազային ոլորտների ղեկավարների մասնակցությամբ հանդիպում է կայացել, որի արդյունքներով էներգետիկ ոլորտում համագործակցության զարգացման մասին հռչակագիր է ընդունվել: Փաստաթղթում նշվում է, որ կողմերը հանդես են գալիս երկարաժամկետ և կայուն միջազգային էներգետիկ համագործակցությանը նպաստող պայմանների ստեղծման օգտին, որը հավասար կերպով հաշվի կառնի էներգիայի արտադրողների, տարանցողների և սպառողների շահերը: Կողմերը նաև ընդունել են Թուրքմենստանից դեպի Եվրոպա բնական գազի առաքման գործում հավասար և փոխշահավետ պայմանների ապահովման կարևորությունը: ԵՄ-ն սկսել է ակտիվորեն լոբբինգ անել Թուրքմենստանից դեպի Ադրբեջան Տրանսկասպյան գազամուղը: Հարավային գազային միջանցքը, որն իր մեջ ներառում է նաև Տրանսկասպյան գազամուղը, մնում է Բրյուսելի առաջնահերթությունը: Այդ գազամուղը կարող է դառնալ Ադրբեջանի և Թուրքիայի կողմից կառուցված TANAP՝ Տրանսանատոլիական գազամուղի մի մասը: Մինչ այդ VERELQ-ը հայտնել որ, Ադրբեջանի նախագահ Իլհամ Ալիևը Россия-24-ին տված հարցազրույցում նշել է, որ Ադրբեջանը մտահոգված է Հարավային գազային միջանցք նախագիծը՝ Եվրոպայում Ռուսաստանի գազային նախագծերին այլընտրանք ներկայացնելու միտումներով: «Այդ ամենը արվում է փորձագիտական մակարդակով, քաղաքագետների և մերձիշխանական կառույցների մակարդակով, ինչը համապատասխան ֆոն է ստեղծում: Եվ այդպիսի քարոզչությունն արդեն որոշ մարդկանց մոտ ընկալվում է որպես իրականություն: Մեր պաշտոնական ներկայացուցիչների կողմից երբեք այդպիսի հայտարարություններ չեն հնչել և մենք երբեք չենք դիտարկել մեր նախագիծը որպես որևէ այլընտրանք», - նշել է Ալիևը: Որպեսզի ԵՄ կարողանա մուտք ունենալ Կասպյան ավազանի էներգետիկ ռեսուրսներին անհրաժեշտ է իրականացնել Թուրքմենստանը և Ադրբեջանը միացնող Տրանսկասպյան գազամուղը: Այդ երկրները կարծում են, որ խողովակաշարի անցկացման համար բավարար է երկու երկրների համաձայնությունը, ինչի հետ համաձայն չեն Ռուսաստանը և Իրանը, որոնց կարծիքով մինչև Կասպից ծովի իրավական կարգավիճակը վերջնականապես չհստակեցվի այդ նախագիծը կարող է իրականացվել միայն մերձկասպյան բոլոր երկրների համաձայնությամբ:
