ՊՆ-ն հերքում է ՄԻՊ-ին՝ կոչ անելով սահմանի մասին տեղեկությունները հայտնելուց առաջ ճշտել

ՀՀ մարդու իրավունքների պաշտպանի կողմից հոկտեմբերի 18-ին կատարվել է գրառում, որում անդրադարձ կա ս.թ. մայիսին ՀՀ Գեղարքունիքի մարզի որոշ հատվածներ ներթափանցած ադրբեջանական ԶՈՒ ներկայացուցիչների կողմից տվյալ տարածքներում իրականացվող ամրաշինական և այլ աշխատանքների հետ։ Այս մասին հաղորդագրություն է տարածել ՀՀ պաշտպանության նախարարությունը, պարզաբանելով, որ նշված գրառման մեջ առկա են մի շարք անճշտություններ, ինչպես նաեւ պնդումներ, որոնք կտրված են իրականությունից։


«Մասնավորապես, ՄԻՊ գրառման մեջ նշվում է, որ «ՀՀ Գեղարքունիքի մարզ ներխուժած ադրբեջանական զինված ուժերը կառուցել են մեծ ապաստարաններ, կուտակել են մեծ քանակությամբ վառելափայտ, բետոնապատել են իրենց դիրքեր տանող ճանապարհները: Նրանց ակտիվությունը վերջին շրջանում շեշտակի է մեծացել։ Ավելին, շարունակում են նոր ճանապարհների կառուցումը, դիրքերում ավելացրել են զինծառայողների քանակն ու սպառազինությունը: Անընդհատ կատարում են դիրքային ամրացման եւ ինժեներական ակտիվ աշխատանքներ»: ՄԻՊ գրառման մեջ առկա այս պնդումներն ակնհայտորեն ուռճացված են, քանի որ ադրբեջանական ԶՈՒ ստորաբաժանումների կողմից ինժեներական ակտիվ աշխատանքներ չեն իրականացվում, մեծ ապաստարաններ, կամ նոր ճանապարհներ չեն կառուցվել, ավելին՝ նրանց կողմից այդպիսի աշխատանքների փորձերը հաջողությամբ կանխվում են ՀՀ ԶՈՒ ստորաբաժանումների կողմից», - նշված է ՊՆ հաղորդագրության մեջ:


Ինչ վերաբերում է ադրբեջանական զինծառայողների թվաքանակի եւ սպառազինության ավելացման մասին պնդմանը, Պաշտպանության նախարարությունից ընդգծում են, որ ադրբեջանական զինծառայողների ամբողջ շարժը վերահսկվում է հայկական ԶՈՒ ստորաբաժանումների կողմից եւ, վերջին շրջանում, նման գործընթաց չի արձանագրվել։


«Կոչ ենք անում մեր հասարակության համար զգայուն թեմաների շուրջ նմանատիպ գրառումներ կատարելիս փաստական ​​տվյալները ճշտել նաեւ պաշտպանական գերատեսչության հետ, որը, ինչպես ամբողջ այս ընթացքում, այնպես էլ հետագայում, պատրաստ է ամենասերտ համագործակցության ՄԻՊ գրասենյակի հետ», - շեշտված է ՊՆ հաղորդագրության մեջ:


 


 


 

Տպել

Թեմայի այլ նորություններ
Загрузка...