Հռոմի Պապ. Այդ ցեղասպանությունը 20-րդ դարի մարդկության աղետն է

Հռոմի Պապ Ֆրանցիսկոսը ՀՀ նախագահի նստավայրում իր ելույթի ժամանակ, անդրադառնալով 1915 թվականի հայոց ցեղասպանությանը, օգտագործեց ցեղասպանություն եզրույթը:

Նա, մասնավորապես, հայտարարեց.

«Այդ ողբերգությունը, այդ Ցեղասպանությունը 20-րդ դարի մարդկության աղետն է, որն իրականացվել է ռասայական գաղափարախոսական կամ կրոնական մոտիվներով. դահիճի արարք, որի վերջնական նպատակը մի ամբողջ ազգի ոչնչացումն էր»:

Ուշագրավն այն է, որ Պապի ելույթի նախնական տարբերակում «ցեղասպանություն» եզրույթը առկա չի եղել, եղել է միայն «եղեռն» եզրույթը, որն էլ արտաբերելուց հետո Սրբազանը նաև հայտարարեց` Ցեղասպանություն:

Այս մասին, ի դեպ, մատնանշել են նաև Հռոմի Պապի հետ Երևան ժամանած արտասահմանցի լրագրողները: Անդրադարձ է կատարել նաև Reuters գործակալությունը: