ՀՀ հարավում առկա իրավիճակը չի համապատասխանում ՀԱՊԿ կանոնադրության դրույթներին. Զաս

Հայաստանի հարավում սրված իրավիճակը չի համապատասխանում ՀԱՊԿ հավաքական պաշտպանության մասին կանոնադրության դրույթներին. դա «սահմանային միջադեպ» է: Այս մասին լրագրողներին հայտնել է ՀԱՊԿ գլխավոր քարտուղար Ստանիսլավ Զասը, հաղորդում է «ՏԱՍՍ»-ը:

Նա նշել է, որ ՀԱՊԿ ներուժը գործադրվում է միայն ագրեսիայի, հարձակման դեպքում, իսկ այս դեպքում գործ ունենք սահմանային միջադեպի հետ.

«Փառք Աստծո, զոհեր չկան, կրակոցներ չկան։ Սա սահմանային միջադեպ է, այն պետք է լուծել, մենք կողմ ենք, որ այն լուծվի խաղաղ ճանապարհով: Հակամարտության սրում չի նկատվում: Չենք կարող խոսել այն մասին, թե իրավիճակն ինչ-որ կերպ սրվում է  կամ վատանում, և դա արդեն լավ է։ Առջևում շատ աշխատանք կա հենց սահմանի, այդ վիճելի հարցի լուծման ուղղությամբ, բայց դրանք պետք է լուծել բանակցությունների սեղանի շուրջ», - ասել է նա:

Ստանիսլավ Սազը նաև ասել է, որ երբ մայիսին Հայաստանը դիմեց ՀԱՊԿ-ին, կազմակերպությունը խորհրդակցություններ անցկացրեց երկրի սահմանամերձ շրջաններում տիրող իրավիճակի վերաբերյալ պաշտպանության նախարարների, անվտանգության խորհուրդների քարտուղարների մակարդակով:

"Ես շփվել եմ և՛ Հայաստանի արտգործնախարարի, և՛ պաշտպանության նախարարի հետ։ Քննարկում էինք ստեղծված իրավիճակը։ Բացի այդ, մեզ մոտ արդեն ընդհանուր քննարկում է տեղի ունեցել Դուշանբեում ՀԱՊԿ ԱԳ նախարարների խորհրդի նիստի ընթացքում: ՀԱՊԿ-ը մշտապես հետեւում է Հայաստանի հարավում տիրող իրավիճակին»,-հավելել է նա:

Նա նաև տեղեկացրել է, որ մոնիթորինգային խմբի ձևավորման մասին որոշում չի ընդունվել, թեև իրավիճակը դիտարկվում է: