ՌԴ խաղաղապահներն ուխտավորներին ուղեկցել են Լեռնային Ղարաբաղի Արամաս վանք

Ռուս խաղաղապահներն ապահովել են հայ ուխտավորների անվտանգությունը Լեռնային Ղարաբաղում գտնվող Ամարաս վանական համալիր իրենց այցելության ժամանակ: Այս մասին հայտնում է ՌԴ ՊՆ մամուլի ծառայությունը։

80 հոգանոց հերթական խումբը ժամանել է Ստեփանակերտից և ոչ հեռու գտնվող այլ քաղաքներից ու բնակավայրերից։ «Շատ շնորհակալ եմ, որ դուք այստեղ եք, որ դուք պահպանում եք մեզ։ Մենք շատ շնորհակալ ենք Ձեզ և ցանկանում ենք, որ դուք միշտ այստեղ լինեք», - խաղաղապահներին է դիմել ուխտագնացներից մեկը՝ Վեսմիրա Գաբրիելյանը։

Ամարասի վանքը գտնվում է կողմերի սահմանազատման գծի անմիջական հարևանությամբ և մտնում է ռուս խաղաղապահների պատասխանատվության գոտու մեջ։

Մայիսի 20-ին ՌԴ խաղաղապահները 3,5 տոննա մարդասիրական օգնություն են փոխանցել Ստեփանակերտի փախստականներին, բազմազավակ ընտանիքներին և հարկադիր տեղահանվածներին:

Ավելի վաղ՝ մայիսի 17-ին, ՌԴ պաշտպանության նախարար Սերգեյ Շոյգուն հեռախոսային բանակցություններ է վարել Հայաստանի իր պաշտոնակից Վաղարշակ Հարությունյանի հետ: Բանակցությունների ընթացքում նախարարները քննարկել են երկկողմ համագործակցությունը եւ Լեռնային Ղարաբաղում իրադրությունը:

Մայիսի սկզբին ՀՀ վարչապետի պաշտոնակատար Նիկոլ Փաշինյանը հայտարարեց, որ ռուս խաղաղապահների ներկայությունը Լեռնային Ղարաբաղում անվտանգության ամուր երաշխիք է: Նա նաեւ ընդգծել է Ռուսաստանի նախագահ Վլադիմիր Պուտինի դերը տարածաշրջանում խաղաղության հասնելու գործում:

Լեռնային Ղարաբաղի հակամարտությունն ավարտվել է 2020 թվականի նոյեմբերի 10-ին Լեռնային Ղարաբաղում ռազմական գործողությունների դադարեցման մասին եռակողմ համաձայնագրի ստորագրումից հետո: Փաստաթուղթը նախատեսում էր նաեւ տարածաշրջանում ռուս խաղաղապահների տեղակայում, հակամարտության կողմերի միջեւ գերիների փոխանակում, Հայաստանի կողմից տարածաշրջանի մի շարք շրջանների հանձնում Ադրբեջանին եւ փախստականների վերադարձ Ղարաբաղ: