Ռուս խաղաղապահները մարդասիրական օգնություն են փոխանցել Ղարաբաղի փախստականներին

Լեռնային Ղարաբաղում ռուսական խաղաղապահ զորախմբի զինծառայողները ապահովել են ռուսական հասարակական կազմակերպությունների և բարեգործական հիմնադրամների կողմից տրամադրված մարդասիրական օգնության առաքումը Լեռնային Ղարաբաղի Ասկերանի շրջանի Խնածախ և Պտրեցիկ հեռավոր բնակավայրեր: Այս մասին հայտնում է Ռուսաստանի Պաշտպանության նախարարությունը։

Մարդասիրական ակցիայի ընթացքում այդ բնակավայրերի բնակիչներին «Ռուսական հումանիտար առաքելություն», «Դոկտոր Լիզա» եւ «Շտապիր դեպի բարություն» բարեգործական կազմակերպությունների անունից ռուս խաղաղապահների կողմից հանձնվել են առաջին անհրաժեշտության իրեր, հագուստ, հիգիենայի պարագաներ և խաղալիքներ երեխաների համար:

«Ակցիայի նախօրեին մարդասիրական արձագանքման կենտրոնի սպաները զանգահարում են բնակավայրերի ղեկավարներին՝ նպատակ ունենալով հստակեցնել բազմազավակ ընտանիքների և հարկադիր վերաբնակների ընտանիքների թիվը», - հայտնել է ռուսական խաղաղապահ զորախմբի հումանիտար արձագանքման կենտրոնի սպա Վլադիսլավ Վիշեգորոդցևը:

«Այստեղ կան երեխաներ, որոնք եկել են Հադրութից։ Նրանք թողել են տուն, եւ այն ամենը, ինչ նրանք ունեն, այնտեղ է մնացել: Եթե պատերազմ չլիներ, երևի այդ խաղալիքները նրանց պետք չէին լինի։ Նրանք ամեն խաղալիք, երբ վերցնում են, ինձ թվում է, որ նրանք պատկերացնում են իրենց խաղալիքները, իրենց տունը: Իմ աչքի առաջ ուրախության արցունքներ հայտնվեցին այն պատճառով, որ մեր ընկերներն օգնում են մեզ»,-մարդասիրական ակցիայի ընթացքում ասաց ուսուցչուհի Եվա Սարգսյանը։

Ընդհանուր առմամբ, բարեգործական կազմակերպությունների գծով ռուս խաղաղապահները ավելի քան 150 տոննա մարդասիրական բեռ են փոխանցել Լեռնային Ղարաբաղի բնակիչներին, որոնց թվում, բացի առաջին անհրաժեշտության ապրանքներից եւ իրերից, փոխանցվել են մասնագիտացված բժշկական սարքավորումներ եւ առաջնային ախտորոշման հավաքածուներ առողջապահության հաստատությունների համար:

Ռուսաստանի նախագահի, Ադրբեջանի նախագահի և Հայաստանի վարչապետի համատեղ հայտարարության մեջ նշված պայմանավորվածությունների համաձայն, 2020 թվականի նոյեմբերի 10-ին Մոսկվայի ժամանակով 00:00-ից սկսած հայտարարվել է Լեռնային Ղարաբաղում կրակի եւ բոլոր ռազմական գործողությունների լիակատար դադարեցում:

Լեռնային Ղարաբաղում կրակի դադարեցման եւ ռազմական գործողությունների վերահսկման համար տեղակայված է Ռուսաստանի Դաշնության խաղաղապահ զորախումբը: Ռուսական խաղաղապահ զորակազմի հիմքը կազմում են Կենտրոնական ռազմական օկրուգի 15 առանձին մոտոհրաձգային բրիգադի (խաղաղապահ) ստորաբաժանումները: