Ադրբեջանական զինուժը փորձել է աշխատանքներ իրականացնել Սյունիքի սահմանին. ՊՆ

Պաշտպանության նախարարությունը հանդես է եկել հայտարարությամբ՝ հերքելով մամուլում տարածվող «Իշխանասարի ուղղությամբ ընթացող մարտերի մասին» տեղեկությունները:


«Մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։


Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։


Մամուլում տարածվող տեղեկությունները «Իշխանասարի ուղղությամբ ընթացող մարտերի մասին» չեն համապատասխանում իրականությանը։ Նման զարգացումների դեպքում պաշտպանության նախարարությունն առաջինը հանդես կգար հայտարարությամբ։ Կոչ ենք անում ձեռնպահ մնալ չճշտված, առավել ևս՝ խուճապ տարածող տեղեկություններ հրապարակելուց», - ասված է ՊՆ-ի հայտարարության մեջ։


VERELQ-ին Գորիսի փոխքաղաքապետ Իրինա Յոլյանը հայտնել է, որ Իշխանասարի հատվածում "թշնամին պետական սահմանը անցել է և ևս երեք կիլոմետր առաջ եկել դեպի Վերիշեն բնակավայր ու հարյուրներով շարված են"։ 


Ըստ լրատվամիջոցների՝ Սյունիքում լարված վիճակ է, Իշխանասարի ուղղությամբ մարտեր են ընթանում: Mediaport-ի հաղորդմամբ, 3-րդ բանակային կորպուսում տագնապ է հայտարարվել, իսկ Գորիսի, Կապանի ու Մեղրիի արական սեռի բնակիչներին հրահանգվել է պատրաստ լինի անհրաժեշտության դեպքում կամավորագրվելու համար: Hraparak-ն էլ տեղեկացնում է, որ Լուսակերտից զորք են տանում Սյունիք։ Մարտական պատրաստվածության թիվ մեկ հրաման են տվել։


 


 

Տպել

Թեմայի այլ նորություններ
Загрузка...