Իրանը մոտ ապագայում խոշոր նավթամուղ կգործարկի. Ռոհանի

Իրանը մոտ ապագայում խոշոր նավթամուղ կգործարկի, որը թույլ կտա երկրին իր նավթի մեծ մասը արտահանել Օմանի ծովով: Այս մասին հայտարարել է Իրանի նախագահ Հասան Ռոհանին, փոխանցում է Tasnim-ը։

«Առաջիկա ամիսներին մենք պետք է բացենք երկու խոշոր նախագիծ։ Դրանցից մեկը Գուրե-Ջասկ նավթամուղն է, որը թույլ կտա Պարսից ծոցից նավթի մեծ մասը արտահանել Օմանի ծով», - ասել է Ռոհանին։ Նա ընդգծել է խողովակաշարի կարեւորությունը քաղաքականության, անվտանգության եւ տնտեսության տեսանկյունից:

Խողովակաշարը սկսվում է Բուշերի հարավ-արեւմտյան նահանգի Գուրեհ նավթային տերմինալից (Պարսից ծոցի ափին) եւ ընթանում է մինչեւ Իրանի հարավ-արեւելքում գտնվող Ջասկ նավահանգստային տերմինալը (Օմանի ծովի ափին):

2 մլրդ դոլար արժողությամբ նախագիծը երկրին թույլ կտա նավթն արտահանել Հորմուզի նեղուցի սահմաններից դուրս: