Սերժ Սարգսյանն առաջիկայում կխոսի. Շարմազանով

ՀՀ երրորդ նախագահ Սերժ Սարգսյանն առաջիկայում կխոսի, հիմնականում Արցախյան թեմայի շուրջ: Այս մասին  լրագրողների հետ հանդիպմանն ասաց ՀՀԿ խոսնակ Էդուարդ Շարմազանովը։

Նա նաև չբացառեց, որ այդ հարցազրույցները պարբերական բնույթ կկրեն. 

«Բոլոր այն մարդիկ, ովքեր իրենց լուման են ներդրել անկախ Հայաստանի ու Արցախի կայացման գործում, նրանք չեն կարող ու չպետք է անմասն մնան այս ազգային պայքարից: ՀՀԿ-ն, մի կողմ դրած իր կուսակցական շահը, պայքարում է ու պայքարելու է մինչև վերջ՝ Սերժ Սարգսյանի գլխավորությամբ», - ասաց Շարմազանովը։

Նրա խոսքով, պետք է պայքարել, հակառակ պարագայում սերունդները չեն ների:

ՀՀԿ խոսնակը շեշտեց՝ քաղաքական ճնշման արդյունքում Նիկոլ Փաշինյանը գնալու է. 

«Արտահերթ ընտրությունների պահանջ չկա, կա Նիկոլ Փաշինյանի հրաժարականի պահանջ. Նիկոլը պետք է հեռանա և վերջ։ Արտահերթ ընտրությունների գնալը նրա օրոք հղի է նոր ցնցումներով, նոր խնդիրներով ու բախումներով։ Ընդդիմադիր բևեռը միակարծիք է՝ պետք է պայքարել դավաճանական ռեժիմից օր առաջ ազատվելու համար: Եթե Փաշինյանի համար Հայաստանի ապագան արժեք չունի, թանկ չէ, ապա մեզ համար թանկ է: Ինքը հրաժարական տալու է ու ոչ շատ հեռու ժամանակաշրջանում», - հավելեց Էդուարդ Շարմազանովը։