ՀՀ վարչապետ Նիկոլ Փաշինյանը պատրաստակամություն է հայտնել ծանոթանալ Արցախի դեմ պատերազմի հանգամանքների ուսումնասիրման համար պարիտետային հանձնաժողովի ձեւավորման վերանայված տարբերակին: Այս մասին նա հայտարարել է այսօր՝ փետրվարի 10-ին, խորհրդարանում կառավարական ժամի ընթացքում։
Ի սկզբանե վարչապետը դեմ էր խորհրդարանական հանձնաժողով ստեղծելու գաղափարին՝ նշելով, որ «Լուսավոր Հայաստան»-ի նախագահի ներկայացրած հանձնաժողովի ձևաչափը չի համարում «պարիտետային»։
«Ձեր առաջարկած հանձնաժողովն ամենևին էլ պարիտետային չէ։ Այն 70 տոկոսով բաղկացած կլինի այն քաղաքական ուժերի ներկայացուցիչներից, որոնք արդեն արտահայտել են իրենց կարծիքը նշված հանձնաժողովի ուսումնասիրության առարկա հանդիսացող հարցի վերաբերյալ», - հայտարարել է վարչապետը։ Նա նշել է, որ եթե նշված ուժերն անհրաժեշտ են համարում ուսումնասիրել այդ հարցը, ինչու են այդ դեպքում իրենք արդեն հրապարակում իրենց եզրակացությունը։
Փաշինյանը նշեց, որ իշխանությունները փորձել են ԼՀԿ-ի հետ հանդիպում կազմակերպել՝ քննարկելու հանձնաժողովի ստեղծման հարցը, սակայն առաջարկը մերժվել է: Բացի վերոնշյալ փաստարկներից, վարչապետը նաև ընդգծել է, որ ներկայումս իրավապահ մարմինների կողմից նշված դեպքերի առնչությամբ հարուցվել է ավելի քան 1000 քրեական գործ: Փաշինյանը նաեւ նշել է, որ երկրի օրենսդրությամբ նախատեսված են նման հարցերի ուսումնասիրման հստակ մեխանիզմներ, եւ այդ մեխանիզմը ԱԺ քննչական հանձնաժողովն է:
Իր հերթին, պարիտետային հանձնաժողովի ստեղծման նախաձեռնության հեղինակ, ԼՀԿ նախագահ Էդմոն Մարուքյանը նշել է, որ հարուցված քրեական գործերը չպետք է դիտարկվեն որպես հանձնաժողով ձևավորելու խոչընդոտ: Նա հիշեցրել է, որ 2008թ.մարտի 1-ի ողբերգական դեպքերից հետո եւս քրեական գործեր են հարուցվել, ինչը չի խանգարել փաստահավաք խմբի ձեւավորմանը:
Տեղի ունեցած իրադարձություններն ուսումնասիրելու համար քննչական հանձնաժողովը չի վայելելու հասարակության վստահությունը, քանի որ այդ հանձնաժողովում մեծամասնություն է լինելու իշխող ուժը։ Անդրադառնալով վարչապետի այն հայտարարությանը, թե նշված ձևաչափը հավասարաչափ չէ, Մարուքյանը նշեց, որ իր մշակած օրինագծում հանձնաժողովի անդամների թվի հարաբերակցությունը վերանայվել է: Իշխող ուժի ներկայացուցիչների թիվն ավելացել է։
Տեղի ունեցած իրադարձությունների մանրամասների բացահայտումը միայն քրեական գործերի միջոցով կհանգեցնի միայն մեկ բանի՝ կձևավորի տպավորություն, թե վարչապետը փորձում է մեղքը բարդել ուրիշների վրա։ Ուստի կարեւոր է ապահովել այդ գործընթացի քաղաքական բաղադրիչը, վստահ է Մարուքյանը։
Ի պատասխան Փաշինյանը պատրաստակամություն հայտնեց ծանոթանալ փաստաթղթին, որից հետո խոստացավ արտահայտել իր դիրքորոշումը:
