ԵԽԽՎ-ում հայկական պատվիրակությունը ձախողում չի համարում հայ ռազմագերիների վերադարձի հարցը կազմակերպության օրակարգում ընդգրկելու իր նախաձեռնության մերժումը։
Նավալնիի հարցը գերակա էր
Այսօր՝ փետրվարի 2-ին, պատվիրակության ղեկավար, «Իմ քայլը» խմբակցության անդամ Ռուբեն Ռուբինյանը նշեց, որ նման նախաձեռնությամբ հանդես գալով՝ հայկական կողմը շատ լավ գիտակցում էր հաջողության իր հնարավորությունները։ «Ի սկզբանե ակնհայտ էր, որ Ալեքսեյ Նավալնու հարցն առաջնահերթություն է ԵԽԽՎ անդամների մեծամասնության համար։ Այնուամենայնիվ, մենք որոշեցինք հանդես գալ այս նախաձեռնությամբ, ինչը մեզ հնարավորություն տվեց բարձրաձայնել խնդիրը, դրա մասին տեղեկացնել ԵԽԽՎ անդամներին», - հայտարարել է նա։
Հայկական պատվիրակությունը նպատակ է դրել բարձրացնել բոլոր հնարավոր մակարդակներում ռազմագերիների վերադարձի հարցը։ Ռուբինյանն ընդգծել է, որ խնդիրը բարձրացվել եւ քննարկվել է թե ԵԽԽՎ բյուրոյում, թե հանձնաժողովներում եւ քաղաքական խմբերում քննարկումների շրջանակներում, թե երկկողմ պաշտոնական հանդիպումների եւ անձնական շփումների շրջանակներում: Արդյունքում, շարունակել է նա, մի քանի քաղաքական խմբերի ղեկավարներ այդ հարցի վերաբերյալ հայտարարություններ են արել, խնդիրը հնչեցրել են լիագումար նիստում եւ սոցիալական ցանցերի իրենց էջերում:
Նույնիսկ բանավեճի դեպքում բանաձևեր չէին ընդունվի
Ձախողման քննադատությանն ու մեղադրանքներին չհամաձայնեց նաև պատվիրակության ընդդիմադիր անդամ, «Լուսավոր Հայաստան» խմբակցության ղեկավար Էդմոն Մարուքյանը։ «ԵԽԽՎ Բյուրոյի համապատասխան որոշումը կայացրել ենք դեռ ուրբաթ օրը, երբ դեռ Երևանում էինք։ Բայց ես կցանկանայի ուշադրություն դարձնել այն հանգամանքի վրա, որ անկախ դրանից մենք հասանք նրան, ինչին ի սկզբանե ցանկանում էինք։ Ըստ էության, քննարկումների կազմակերպումը, որը մենք պահանջում էինք, չէր հանգեցնի որևէ փաստաթղթի ընդունմանը։ Նա միայն թույլ կտար բարձրաձայնել խնդիրը և հասնել ԵԽԽՎ անդամների արձագանքին», - հայտարարեց նա՝ ընդգծելով, որ այդ նպատակը ձեռք է բերվել։
«Մեր նպատակը, մեծ հաշվով, Ադրբեջանի դեմ միջազգային ճնշման ուժեղացումն ու կոնսոլիդացումն է», - հայտարարել է նա՝ հավելելով, որ եթե քննարկումները լինեին, ապա նույն արդյունքներն էին լինելու։ «Պետք չէ մտածել, որ բանավեճի կազմակերպումը կհանգեցնի մեր գերիներին հաջորդ առավոտյան վերադարձնելուն», - հայտարարել է Մարուքյանը:
Նշանակվել է Արցախի պատերազմից հետո հումանիտար իրավիճակի զեկուցող
Պատվիրակության անդամ, «Իմ քայլը» խմբակցության անդամ Տաթեւիկ Հայրապետյանը նշեց, որ ադրբեջանական պատվիրակությունը փորձել է տպավորություն ստեղծել առ այն, թե հակամարտությունը լուծված է եւ կողմերին մնում է միայն լուծել ապահովման հարցը փոխվստահության մթնոլորտում: Ավելին, ադրբեջանական կողմը փորձել է տպավորություն ստեղծել, թե կառուցողական կողմ է, սակայն միգրացիայի հարցերով հանձնաժողովում քննարկումների ժամանակ անցել է իր սովորական ագրեսիվ հռետորաբանությանը։
«Երբ ես բարձրացրեցի ռազմագերիների և պահված քաղաքացիական անձանց վերադարձի հարցը, նրանք սկսեցին նրանց ահաբեկիչներ անվանել, ինչը տարակուսանք առաջացրեց հավաքվածների մոտ ՝ միաժամանակ քանդելով միֆը, որն այդքան ջանասիրաբար էին ստեղծում», - հայտարարել է Հայրապետյանը: Նա նշեց, որ հանձնաժողովում նշանակվել է Արցախի դեմ պատերազմի հետևանքով ձևավորված հումանիտար իրավիճակի զեկուցող: «Հայ գերիների հարցը նույնպես կարտացոլվի զեկույցում», - հավելել է նա։
ԵԽԽՎ-ում աշխատանքը մարզական միջոցառում չէ
Անդրադառնալով ԶԼՄ-ների քննադատություններին և հայկական պատվիրակության ձախողման մեղադրանքներին՝ «Իմ քայլը» խմբակցության անդամ, պատվիրակության անդամ Վլադիմիր Վարդանյանը նշեց, որ ցավոք, երբեմն միջազգային կազմակերպություններում պատվիրակությունների գործունեությունը Հայաստանում գնահատում են որպես մարզական մրցություն: Նա հիշեցրել է, որ դիվանագիտության հաջողությունն ավելի քիչ է զգացվում ի տարբերություն, օրինակ, մարտական գործողություններում հաջողության։
«Դիվանագիտական հաջողությունները հասնում են փոքր քայլերով։ Սկզբում հայտարարություններ, հետո զեկույցներ ու բանաձևեր, որոնք հետագայում կարող են օգտագործվել նաև Եվրոպական դատարանում», - հայտարարեց նա։ Վարդանյանը վստահ է, որ Ադրբեջանի վրա ճնշումը գնալով միայն կուժեղանա։
Լրագրող՝ դուք պատասխանատու եք ամեն ինչի համար
Պատվիրակության մեկ այլ անդամ, իշխող դաշինքի պատգամավոր Հովհաննես Իգիթյանը նշեց, որ ընդհանուր առմամբ ԵԽԽՎ անդամների մեծ մասը քննադատաբար է տրամադրված եղել Ադրբեջանի նկատմամբ։ Բացի այդ երկրում քաղբանտարկյալների և ՀԿ-ների գործունեությանն առնչվող ավանդական խնդիրներից, քննադատությունը վերաբերում էր նաև Արցախի դեմ ադրբեջանական կողմի գործողություններին։
«Կա ըմբռնում, որ Ադրբեջանը գնացել է ստատուս քվոյի փոփոխության ուժի կիրառման ճանապարհով, Ադրբեջանը խախտում է ձեռք բերված պայմանավորվածությունները», - հայտարարել է Իգիթյանը և ընդգծել է այդ դժգոհության կապիտալիզացիայի անհրաժեշտությունը: Այս հարցում կարևոր դեր է խաղում Հայաստանից բխող տեղեկատվությունը։
Իգիթյանը նշել է, որ ԵԽԽՎ-ի հետ սկսել է աշխատել դեռեւս 27 տարի առաջ եւ կարող է մի բան հստակ ասել այս կամ այն հարցի նկատմամբ վերաբերմունքը ձեւավորում են ոչ միայն ազգային պատվիրակություններ, այլեւ երկրից բխող տեղեկատվություն: «Հայաստանում ապատեղեկատվության ցունամիի մեջ ռազմագերիների հարցը պարզապես կորել է, մեզ ավելի հաճախ են հարց տվել ներքին իրավիճակի եւ արտահերթ ընտրությունների մասին», - հայտարարել է նա՝ ընդգծելով երկրի լրատվամիջոցների աշխատանքի կարեւորությունը:
Տեխնիկական կամ իրական
Պատվիրակության անդամները հերքեցին տեղեկությունն այն մասին, որ հայկական պատվիրակության աշխատանքը համակարգված չի եղել, իսկ պատվիրակության ղեկավար Ռուբեն Ռուբինյանը պատվիրակությունը գլխավորում է միայն «տեխնիկապես»:
«Ես չէի նսեմացնի պատվիրակության որևէ անդամի ներդրումը։ Դա համակարգված թիմային աշխատանք էր։ Ես առաջարկեցի հանդես գալ ռազմագերիների վերադարձի հարցով բանավեճեր կազմակերպելու նախաձեռնությամբ, մենք միասին քննարկեցինք եւ սկսեցինք աշխատել այդ ուղղությամբ՝ նախապես համաձայնեցնելով քայլերը եւ մի կողմ թողնելով քաղաքական հակասությունները եւ նույնիսկ անձնական տարաձայնությունները», - հայտարարել է Մարուքյանը։
Տաթևիկ Հայրապետյանը նաև նշեց, որ պատվիրակությունը հանդես է եկել միասնական ճակատով՝ կողմ թողնելով քաղաքական հայացքները:
Այդուհանդերձ, պատվիրակության մյուս երկու անդամները՝ «Բարգավաճ Հայաստան» խմբակցության պատգամավորներ Նաիրա Զոհրաբյանն ու Միքայել Մելքումյանը, Ստրասբուրգ կատարած այցի արդյունքներով պատվիրակության մամուլի ասուլիսին չէին մասնակցում։ Պատճառը պատվիրակության ղեկավար Ռուբեն Ռուբինյանը չկարողացավ նշել՝ սահմանափակվելով միայն այն հայտարարությամբ, թե երկու պատգամավորներն էլ տեղյակ են եղել միջոցառման մասին։
