Պարտված առաջնորդը չի կարող լուրջ բանակցություններ վարել. Միքայել Մելքումյան

Նախօրեին Մոսկվայում կայացած հանդիպումները ցույց տվեցին, որ պարտված առաջնորդը չի կարող լուրջ բանակցություններ վարել։ Այս մասին այսօր՝ հունվարի 12-ին, լրագրողների հետ զրույցում ասաց «Բարգավաճ Հայաստան» խմբակցության անդամ Միքայել Մելքումյանը՝ ամփոփելով Պուտին-Փաշինյան-Ալիեւ հանդիպման արդյունքները։

Նրա խոսքով, եթե հայկական կողմն ինչ-որ պահանջներ ու առաջարկություններ ուներ, դրանք լուրջ չընդունվեցին բանակցությունների կողմերից ոչ մեկի կողմից: Արդյունքում Հայաստանին պարտադրվեց այն, ինչ ի սկզբանե քննարկվել և համաձայնեցված էր։ «Այլ կերպ ասած՝ պարտվողական քաղաքականության ծրագիրը շարունակվում է», - վստահ է Մելքումյանը։

Հաշվի առնելով վերոնշյալ իրողությունները՝ շարունակեց նա, վարչապետի հրաժարականի պահանջները մնում են արդիական։ «Իշխանության պետք է գան նոր մարդիկ, ովքեր կկարողանան արժանապատիվ կերպով ներկայացնել երկիրը բանակցություններում և նոր լիցք ու նոր բովանդակություն հաղորդեն Ռուսաստանի հետ հարաբերություններին», - կարծում է պատգամավորը:

Նա նշել է, որ նոր իշխանությունները պետք է վերանայեն եւ ընդլայնեն պաշտպանության ոլորտում համագործակցության մասին պայմանագիրը, դիտարկեն Հայաստանում «եւս մեկ, գուցե նաեւ երկու ռուսական ռազմակայանների տեղակայման հնարավորությունը»:

Խոսելով հանդիպման արդյունքների մասին՝ Մելքումյանը նշել է, որ սահմանների բացումն ու ճանապարհների կառուցումը «հայ տղաների արյան վրա ոչ մեկին պետք չէ»: Ադրբեջանում մեծ քանակությամբ հայ ռազմագերիների առկայության պայմաններում սահմանների բացման մասին խոսակցությունները պատգամավորին կասկածելի են թվում։

Նա նշել է, որ երկաթուղային հաղորդակցության կառուցումը նույնպես կասկածելի է թվում տնտեսական նպատակահարմարության տեսանկյունից, առնվազն այն տեսանկյունից, ինչպես փորձում են այն ներկայացնել իշխող «Իմ քայլը» դաշինքի ներկայացուցիչները: Հարցը պարունակում է բազմաթիվ անորոշություններ՝ սկսած այն բանից, թե ինչպես է հայկական կողմը օգտագործելու այդ հաղորդակցության ուղին՝ ավարտած, թե ինչպես է ընթանալու երթուղին։