Բանկային արձակուրդներ և բաշխված միլիարդներ. Փաշինյանը՝ հակաճգնաժամային ծրագրի մասին

Այս պահի դրությամբ կառավարության հակաճգնաժամային միջացառումների շրջանակում արդեն իսկ բաշխվել է 3,6 մլրդ դրամ: Այդ մասին նախքան կառավարության ապրիլի 9-ի նիստի մեկնարկը հայտարարեց վարչապետ Նիկոլ Փաշինյանը՝ նշելով, որ այդ թիվը նախատեսված սոցիալական աջակցության ողջ փաթեթի 10 տոկոսից էլ պակաս է:

«Այն լրացվելու է», - վստահեցրեց Փաշինյանը՝ նկատելով, որ կառավարությունն արդեն իսկ հրապարակել է այն էլեկտրոնային պատուհանը, որով քաղաքացիները կարող են ստուգել՝ արդյոք իրենք տվյալ սոցիալական ծրագրերի շահառու են, թե ոչ: Նա տեղեկացրեց, որ այս օրերին շատ քաղաքացիներ իրենց անունները չեն գտել, քանի որ բազան թարմացվում է: «Բազան ամենաուշը հաջորդ շաբաթվա սկզբին կամբողջանա և աջակցության փաթեթները հասանելի կլինեն բոլոր շահառուներին», - նկատեց վարչապետը:

Վարչապետ Նիկոլ Փաշինյանը նաև հրապարակեց թվեր բանկային արձակուրդների մասին: «ՀՀ առևտրային բանկերն արդեն իսկ 250 հազար քաղաքացիների տրամադրել են վարկային արձակուրդ՝ 9,3 մլրդ դրամի չափով: «Վարկային արձակուրդ է տրամադրվել նաև 5300 իրավաբանական անձանց 15,4 մլրդ դրամի չափով: Այս որոշումները կայացվել են առանց որևէ վարչական ներգործության կառավարությա կողմից», - ասաց նա՝ նշելով, որ ճգնաժամի մեկնարկին շատ ուժեր մեզ փորձում էին դրդել, որպեսզի գործադիրը վարչական որոշում կայացնի և այն պարտադրվի բանկերին:

Ըստ Փաշինյանի կայուն է վիճակը նաև ֆինանսական շուկայում, որի մասին վկայում է արտարժույթի շուկայի հանդարտ վիճակը: «Մի քանի օրվա լարվածությունից հետո արտարժույթի շուկան գտնվում է շատ հանդարտ վիճակում: Ընդհակառակը, վերջին օրերին բանկային ավանդների աճի որոշակի միտում է նկատվում: Ընդ որում կան արդեն դեպքեր, երբ քաղաքացիները դոլարային ավանդները փոխարկում են դրամային ավանդների», - եզրափակեց Փաշինյանը:

VERELQ-ը հիշեցնում է, որ կառավարությունը հակաճգնաժամային ինը միջոցառումներ է իրականացնում, որոնց ընդհանուր արժեքը գնահատվում է 150 մլրդ դրամ: