Փաշինյանի բանաձևն Արցախի հարցում.Հզոր բանակ, ուժեղ տնտեսություն և դեմոկրատիա

«Արցախը և Հայաստանն անվտանգության ընդհանուր տարածք են, անվտանգային ընդհանուր միջավայր են և այստեղ մեր օրակարգը որևէ ձևով չի կարող տարանջատված և տարբերակված լինել»: Այդ մասին Ստեփանակերտում տեղի ունեցած Անվտանգության խորհուրդների նիստի ընթացքում հայտարարել է Հայաստանի վարչապետ Նիկոլ Փաշինյանը։

Փաշինյանի մեսիջն ուղղված է Արցախի հասարակությանը՝ՀՀ-ն, անկախ Երևանում քաղաքական թիմի և ղեկավարության փոփոխությունից, շարունակելու է մնալ Արցախի անվտանգության, այդ թվում ռազմական, գլխավոր երաշխավորն ու այդ մեսիջը պետք է հստակ գիտակցեն նաև Ադրբեջանում: Արցախ-ՀՀ տարաձայնություններ չպետք է փնտրել՝պատերազմի դեպքում ՀՀ-ի ու Արցախի հասարակությունները բռունցքվելու ու համախմբվելու են այդ պահին գործող իշխանությունների շուրջ և միասնաբար դիմագրավեն արտաքին սպառնալիքներին:

Իր ելույթում Նիկոլ Փաշինյանն ընդգծել է, որ Հայաստանում և Արցախում բանակը բացարձակ և անառարկելի հեղինակություն է:

«Զինված ուժերը մեր անվտանգության ամենաառաջնային երաշխիքը և երաշխավորն են, բայց ուզում եմ ասել, որ այդ առաքելության իրականացման մեջ բանակին երբեք միայնակ պետք չէ թողնել և պետք է բանակի գործառույթային ծանրաբեռնվածությունը որոշակիորեն թեթևացնել», - նշել է նա:

ՀՀ վարչապետը գտնվելով Արցախում նաև որոշակի ռևերանս է անում արցախյան գեներալիտետին՝ընդգծելով բանակի դերն ու նշանակությունն Արցախի կյանքում: Գեներալիտետը, իսկ Արցախում դա պատերազմով անցած գեներալիտետ է, միշտ էլ զգալի դերակատարում է ունեցել պետության բոլոր օղակներում և ոլորտներում, ինչպես նաև բարձր վարկանիշ ունի հասարակության աչքում: Փաշինյանն ընդգծելով բանակների դերը նաև մեսիջ է հղում Մինսկի խմբին ու Բաքվին, ինչքան էլ լինեն արտաքին երաշխավորություններ՝անվտանգության առումով ՀՀ-ն ու Արցախը հույսը դնելու են միայն իրենց բանակների մարտունակության վրա:

«Մեր անվտանգության կարևորագույն բաղադրիչներից մեկը մեր երկրների տնտեսությունների մրցունակությունն է: Տնտեսությունն է, որ պետք է Հայաստանի ու Արցախի Զինված ուժերին ապահովի անհրաժեշտ ռեսուրսներով` իրենց գործառույթներն իրականացնելու համար, և այսօրվա օրակարգում մենք կքննարկենք նաև տնտեսական ռազմավարական նշանակություն ունեցող հարցեր», - նշել է Փաշինյանը:

Փաշինյանը գիտակցում է, որ Ադրբեջանի հետ սպառազինությունների մրցավազքին դիմագրավելու ու Արցախում բնակչության թվաքանակի բարձրացման, սոցիալական վիճակի բարելավման համար անհրաժեշտ է ունենալ արտաքին առկա մարտահրավերներին դիմագրավելու ներուժ ունեցող տնտեսություն: Այսօրվա տնտեսական վիճակը չնայած որոշակի դրական դիմամիկայի ունի բազմաթիվ խնդիրներ՝այդ թվում աշխատատեղերի ստեղծման, ներդրումների ներգրավման, մարզերի ու գյուղական շրջանների համաչափ զարգացման առումով: Տնտեսությունը պետք է լինի նաև դեմոգրաֆիկ առկա սպառնալիքների լուծման բանալիներից մեկը կամ բազիսը, որի վրա պետությունը պետք է մշակի դեմոգրաֆիական հստակ ռազմավարություն՝թե ՀՀ-ում, թե Արցախում:

Անդրադառնալով Արցախում առաջիկայում կայանալիք ընտրություններին Փաշինյանը նշել է, որ ընդհանրապես Արցախի գոյության ողջ ընթացքում տեղի ունեցած ընտրություններն ի ցույց են դրել ժողովրդավարական առումով Արցախի և Ադրբեջանի միջև բոլորովին տարբեր իրողությունների գոյությունը, ինչը ևս մեկ անգամ գալիս է հիմնավորելու, որ Արցախը և Ադրբեջանը երբևէ որևէ պարագայում չեն կարող լինել ընդհանուր քաղաքական տարածքում։

Փաշինյանը ցանկանում է Արցախում տեսնել ազատ և թափանցիկ՝մրցակցային ընտրություններ, ինչը պետք է ժողովրդավարության առումով տարբերվի Ադրբեջանում վերջերս կայացած և միջազգային գրեթե բոլոր կազմակերպությունների կողմից ֆիքսված խայտառակ ընտրությունների հետ՝թե ԶԼՄ-ների, ընդդիմության ճնշման առումով, թե լցոնումների և վարչական ռեսուրսների կիրառման: Փաշինյանն ուղիղ չի աջակցում թեկնածուներից որևէ մեկին, սակայն Արցախում գտնվելով պահանջում է իշխանություններից ապահովել ազատ, ժողովրդավարական ընտրություններ, որպեսզի Արցախի նոր իշխանությունները չունենան լեգիտիմության խնդիր:

Այսպիսով, Փաշինյանի մեսիջներն երեքն են՝Արցախի անվտանգությունն երաշխավորելու են մարտունակ բանակը, տնտեսությունն ու ժողովրդավարությունը, իսկ ՀՀ-ն շարունակելու է մնալ վերոնշյալ գործոնների երաշխավորն ու աջակիցը:

Վարդան Վարդանյան