Նոր նշանակումներ ու պաշտոնանկություններ. Փաշինյանը որոշումներ է ստորագրել

ՀՀ վարչապետ Նիկոլ Փաշինյանի որոշմամբ, նշանակվել է Կադաստրի կոմիտեի ղեկավարի տեղակալ: Փաշինյանը կատարել է նաև այլ կադրային փոփոխություններ:

ՀՀ կառավարության կայքում հրապարակված համապատասխան որոշման մեջ ասվում է. Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 4-րդ մասով՝

Արման Պետրոսյանին նշանակել կադաստրի կոմիտեի ղեկավարի տեղակալ:

Փաշինյանը փետրվարի 3-ին որոշում է ստորագրել՝ Արման Խոջոյանին ՀՀ Էկոնոմիկայի փոխնախարար նշանակելու մասին:

Նախորդ տարվա նոյեմբերին «Առողջապահական ծրագրերի իրականացման գրասենյակ» հիմնարկի տնօրենի պաշտոնում նշանակված Հովակիմ Պոդոսյանը, վարչապետի որոշմամբ, ազատվել է զբաղեցրած պաշտոնից:

«Հիմք ընդունելով Հայաստանի Հանրապետության կառավարության 2010 թվականի նոյեմբերի 25-ի N 1550-Ն որոշման 2-րդ կետով հաստատված կանոնադրության 27-րդ կետը՝

Հովակիմ Պոդոսյանին ազատել առողջապահության նախարարության «Առողջապահական ծրագրերի իրականացման գրասենյակ» պետական հիմնարկի տնօրենի պաշտոնակատարի պաշտոնից»,- ասված է որոշման մեջ։

ՀՀ վարչապետի մեկ այլ որոշմամբ՝ Երվանդ Էլիբեկյանը նշանակվել է նույն պաշտոնում:

Փոփոխությունները չեն շրջանցել նաև տարածքային կառավարման և ենթակառուցվածքների նախարարությունը:

ՀՀ վարչապետի՝ փետրվարի 3-ին ստորագրած որոշման համաձայն, Բագրատ Բադալյանն ազատվել է տարածքային կառավարման և ենթակառուցվածքների փոխնախարարի պաշտոնից:

ՀՀ կառավարության կայքէջում հրապարակված որոշման մեջ ասվում է.

«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 1-ին մասով՝

Բագրատ Բադալյանին ազատել տարածքային կառավարման և ենթակառուցվածքների նախարարի տեղակալի պաշտոնից»: