Տնտեսական անկում. Մինասյանը գտել է Փաշինյանի «աքիլեսյան գարշապարը»

Վատիկանում ՀՀ նախկին դեսպան Միքայել Մինասյանը ֆեյսբուքյան իր էջում խիստ քննադատության է ենթարկել ՀՀ այսօրվա իշխանություններին և մեղադրել է Նիկոլ Փաշինյանին ու նրա քաղաքական թիմին՝ մի ամբողջ ժողովուրդ խաբելու համար:

Մինասյանի քննադատության թիրախում են Փաշինյանի տնտեսական ձախողումները՝ նախկին խոստումների և այսօրվա վիճակի միջև առկա տարբերությունը: Ներդրումների բացակայության, գազի գնի բարձրացման թեմաների վրա շեշտադրումը խոսում է այն մասին, որ նախկին իշխանությունները գտել են Փաշինյանի «աքիլեսյան գարշապարը»՝ սոցիալական, տնտեսական հարցերում լուրջ ձեռքբերումների բացակայությունը:

Փաշինյանը կամ պետք է չեզոքացնի այդ բացը՝լրջագույն փոփոխություններ իրականացնի տնտեսության ոլորտում կամ նախկին իշխանությունները շարունակելու են քաղաքական դիվիդենտներ հավաքել այդ թեմաների վրա ու նպաստեն հասարակության մոտ հիասթափության խորացմանն ու Փաշինյանի ռեյտինգին հարվածելու ռազմավարությունը լինելու է շարունակական:

Մինասյանը գրում է, որ «այս իշխանությունները մարդ չեն»՝այդ կերպ փորձելով «դեսակրալիզացիայի» ենթարկել Փաշինյանին ու նրա թիմին, այսինքն փոչիացնել այն իմիջը, որը թավշյա հեղափոխությունից մինչ այս պահը կառուցվում է ՀՀ վարչապետի անձի շուրջ:

Մինասյանն ու նրա թիմը տիրապետելով զգալի ֆինանսական և մարդկային ռեսուրսների, ինչպես նաև ԶԼՄ-ների ու մեդիահարթակների շարունակելու է թիրախային հարվածել Փաշինյանի բացթողումներին՝ այդ կերպ «հյուծիչ պատերազմ» հայտարարելով ՀՀ վարչապետի բարձր ռեյտինգին ու փողոցը կառավարելու նրա գործիքակազմին:

Ֆեյքերով հարվածել նախկիններին՝ դա արդեն անցած փուլ է և այդպիսի գործիքակազմն արդեն չի աշխատում, հանրությունը հոգնել է շոուներից, ձերբակալություններից, անվերջանալի լայվերից: Նրանք սպասում են իրենց սոցիալական դրության բարելավմանը, աշխատավարձերի ավելացմանն ու գնաճի դադարեցմանն, այսինքն նրանց պահանջները Փաշինյանից ոչ թե քաղաքական են՝ դրանք այդպիսին էին թավշյա հեղափոխության օրերին, այժմ նրանք ցանկանում են սոցիալ-տնտեսական կյանքի բարելավում:

Սոցիալ-տնտեսական ոլորտում կտրուկ փոփոխություններ չգրանցելու դեպքում Փաշինյանի ռեյտինգը շարունակելու է նվազել ու իշխանության պահպանման խնդիրը դառնալու է օրակարգային հարց: