Ջորջ Սորոսը ցանկություն է հայտնել ինձ հետ հանդիպել. Փաշինյանը՝ «Սորոսի մարդ» լինելու մասին

Դավոսի ֆորումից առաջ «Բաց հասարակության հիմնադրամների» հիմնադիր Ջորջ Սորոսը ցանկություն էր հայտնել ինձ հետ հանդիպել, բայց իմ աշխատանքային գրաֆիկը շատ խիտ էր և որևէ կերպ չհաջողվեց հանդիպման նրա խնդրանքը բավարարել։ Այս մասին Լոս Անջելեսում  ասուլիսի ժամանակ ասաց ՀՀ վարչապետ Նիկոլ Փաշինյանը:

Նա նշեց, որ իրեն հայտնի է, որ երկու վարկած է շրջանառվում այն թեմայի կոնտեքստում, թե ինքը «Սորոսի մարդն է»։

Ըստ Փաշինյանի, առաջինի դեպքում դավադրության տեսության հեղինակները պնդում են, որ ինչ-որ տեղ պլանավորվել է, այնտեղ, որտեղ պլանավորվում են հայտնի հեղափոխությունները, բայց այնտեղ, որտեղ պլանավորվում են հեղափոխությունները, «պակաս կասկածանքների և տառապանքների մեջ չեն, որովհետև ասում են՝ չհասկացանք, եթե այս հեղափոխությունը մենք չենք արել, ապա այդ ո՞վ է համարձակվել առանց մեր թույլտվության անի հեղափոխություն»։

«Ես բոլոր կողմերին խնդրում եմ հանդարտվել, որովհետև նրանք, ովքեր եղել են Հայաստանում, և ոչ թե իրենց կաբինետներում և իրենց աշխատանքային սեղանների տակ մտած, լավ գիտեն՝ ով է արել հեղափոխությունը: Հեղափոխությունը եղել է ուղիղ եթերում և այս պատմությունը երկար տարիների պատմություն ունի»,-նշեց վարչապետը։

Փաշինյանը շեշտեց՝ հեղափոխությունն արել է ժողովուրդը, դրա հեղինակային իրավունքը ժողովրդինն է, իսկ ովքեր ուզում են դա վերապահել ուրիշներին ուղղակի անարգանքի են ենթարկում հայ ժողովրդին․

«Նրանք, ովքեր ուզում են Սորոս կամ ինչ-որ բան խառնեն, նրանք ուզում են վիրավորած լինել հայ ժողովրդի արժանապատվությանը։ Այդ մարդկանց հայ ժողովուրդը նետել է պատմության աղբանոցը, որից դուրս չեն գալու»,- հավելեց Նիկոլ Փաշինյանը։