Չեմ կարծում, որ ամբողջ ընթացակարգը ավարտվել է, լրագրողների հետ զրույցում ասաց վարչապետի խոսնակ Վլադիմիր Կարապետյանը՝ անդրադառնալով Բաղրամյան 26-ում Ամուլսարի հանքի շահագործման վերաբերյալ անցկացված քննարկմանը:
«Վարչապետն ասել է, որ այս պահին հիմքեր չկան դադարեցնելու համար, ինքը չի ասել, որ պետք է շահագործվի: Չեմ կարծում, որ ամբողջ ընթացակարգը ավարտվել է, սպասենք վերջնական արդյունքի», - ասաց նա:
Կարապետյանը նկատեց, որ ժամեր անց քննարկման սղագրությունը կհրապարկվի կառավարությունում. «Այնտեղ շատ հարցերի պատասխաններ կարող եք գտնել»: Անդրադառնալով բնապահպանների պնդմանը, որ նոր փորձաքննությունն է անհրաժեշտ, Կարապետյանն ասաց. «Այս պահին չենք տեսնում հիմքեր նոր ուսումնասիրության համար»:
Նշնեք, որ այս պահին լարված իրավիճակ է Բաղրամյան պողոտայում՝ Ազգային ժողովի դիմաց: Ամուլսարի շահագործման դեմ պայքարող ակտիվիստները նախագահականում տեղի ունեցած քննարկումից հետո որոշել էին մտնել Ազգային ժողովի այգի եւ քննարկում անցկացնել Ամուլսարի թեմայով, սակայն ոստիկանները թույլ չեն տվել ներս մտնել եւ փակել են ԱԺ այգու դարպասները:
«Բացեք դռները, հանրության առաջ դուռ չեն փակում»,- վանկարկում էին ցուցարաները: Տեսնելով, որ արդյունքի չեն հասնում, նրանք փորձեցին փակել Բաղրամյան պողոտան եւ նստացույց իրականացնել, սակայն նրանց եւ ոստիկանների միջեւ միջադեպ տեղի ունեցավ: Ոստիկանությունը կոչով դիմեց քաղաքացիներին՝ ժամանակ տրամադրելով բացել այդ հատվածը, հակառակ դեպքում իր լիազորությունների շրջանակներում ոստիկանությունը կարող է ֆիզիկական ուժ գործադրել: Որոշ ժամանակ անց ոստիկանները ուժով հեռացրին ակտիվիստներին երթեւկելի հատվածից:
Այս պահին ցուցարարաների ակցիան շարունակվում է Ազգային ժողովի դիմաց:
Ավելի վաղ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները: Դրա կատարումը հանձնարարվել էր Advanced Resources Development (ELARD) ընկերության փորձագետների խմբին: Ըստ փորձաքննության արդյունքների՝ հավանականությունը շատ ցածր է, որ Ամուլսարի հանքի աղտոտված ջրերը ազդեցություն կունենան Ջերմուկի աղբյուրների վրա, քանի որ ստորգետնյա ջրերի հոսքի եւ աղտոտումը փոխանցելու ուղիներ առկա չեն:
Հանքավայրի շահագործման դեմ եւ կող հանդես եկողներն այս փաստաթութղն ընդունեցին տարբեր կերպ: Նրանք, որ կողմ են հանքավայրի շահագործմանը մատնանշում են Ջերմուկի տերմալ ջրերին աղտոտման հավանականության բացակայությունը եւ Լիդիանի՝ պետության դեմ դատական հայց ներկայացնելու հավանական ֆինանսական բացասական հետեւանքները: Իսկ բնապահպանները մատնացույց են անում զեկույցում մատնանշված բնապահպանական ռիսկերը:
Միեւնույն ժամանակ «Լիդիան Արմենիա»-ն ներկայացրել է բնապահպանական փորձաքննության եզրակացության առաջարկների մասին պատասխաններ:
