Նոր Հայաստան, սեր ու համերաշխություն գոռալով արյունոտ ձեռքերը չեն մաքրվում: Այս մասին Facebook-ի իր էջում գրել է 1996 թվականին Երևանի պետական բժշկական համալսարանի դաժանաբար սպանված ուսանող Իոսիֆ Աղաջանովի հայրը՝ Միխայիլ Աղաջանովը, մեկնաբանելով որդու սպանության մեջ մեղադրված ու ցմահ ազատազրկման դատապարտված Մհեր Ենոքյանի հայտարարություններն ու համառ լուրերը, որ վերջինիս ներում կշնորհվի:
«Նոր Հայաստան, սեր ու համերաշխություն գոռալով արյունոտ ձեռքերը չեն մաքրվում...
Հարգելի ընթերցող, արդեն 23-րդ Ամանորն ենք դիմավորում առանց որդուս... առանց լուսավոր մի երիտասարդի, ով այս կյանքում միայն 19 ամանոր դիմավորեց... ով սիրում ու սիրված էր, ով ապրում ու ապրեցնում էր, ով դեռ ով գիտի ինչքան երազներ ուներ այս կյանքում...բայց...
Ամեն ինչ կտայի, որ մարդասպան, իսկ հիմա «սեր ու համերաշխություն» գոռացող Մհեր Ենոքյանը հանդիպած չլիներ որդուս... ամեն ինչ կտայի, որ հիմա ստիպված չլինեի թղթին տալ ինչ մտածում եմ...
Հիմա ստիպված եմ գրել... ստիպված եմ հանուն արդարության ու որդուս պայծառ հիշատակի անդրադառնալ «ՍԵՐ ու ՀԱՄԵՐԱՇԽՈՒԹՅՈՒՆ» գոռացող մարդասպանի մեզ ուղղված հրապարակային խոսքին, խոսք, որում ստոր սուտն է գերակշռում, խոսք, որին «բռավո» է գոռում հասարակության մի զանգված...
Անկեղծ չեմ հասկանում. իմ միտքն ի զորու չէ հասկանալ, թե մարդասպանին հրապարակային «բռավո» գոռալուց և ստոր ստեր պարունակող հոդվածների տակ մեկնաբանություններ անելուց առաջ ինչ են մտածում մարդիկ... արդյոք նրանք մտածում են այն մասին, թե ինչ կզգային իրենք, երբ մհերներն իրենց հարազատի պարանոցը կտրեին, որից հետո բարձր, շատ բարձր սեր ու համերաշխություն գոռային, արդարությունից ու արդարադատությունից խոսեին, արդյոք նրանք երբևէ մտածում են այն մասին, թե ինչ ենք զգում մենք իրենց «բռավոները» կարդալիս...
Միթե մեր հասարակությունում դեռ կան այնպիսինները...
Բանը նրան է հասել, որ արդեն մեզ` Աղաջանովներիս մտավորականի ընտանիքին ստոր կերպով զրպարտում են, թե
-իբրև մենք իշխանություններին պատվեր ենք տվել Մհեր Ենոքյանին մահապատժի դատապարտելու,
-իբրև մենք նորմալ տպավորություններ ունենք որդուս սպանության մեջ մեղադրվող մյուս մարդասպան Արամ Հարությունյանից, իբրև մենք խնայում ենք նրան, «փայփայում»,
-իբրև մենք փորձում ենք գումարով հաղորդում պատվիրել Մհեր Ենոքյանի դեմ և սևացնել նրան,
-իբրև մենք տարիներ շարունակ լուրեր ենք տարածում, թե մասնատել են որդուս մարմինը...
և այսպես շարունակ...
Ստոր ստերի շարան... ստեր, որոնց հիման վրա փորձ է արվում հասարակական կարծիք ու ճնշում ձևավորել... մտնել գործից անտեղյակ մարդկանց հոգիներ ու զոհ երևալ...
...որ ողջամիտ մարդը կհավատա այս ստերին, որ ողջամիտ մարդը կհավատա նրան, որ աշխարհում կարող է լինել մի բանական մարդ, ով իր որդուն սպանողի հասցեին ունակ է գովեստի խոսքեր ասել... և ինչ է նշանակում գումարով հաղորդում պատվիրել...ում դեմ, ինչի համար...արդարադատությունն իր խոսքը վաղուց ասել է և ինչպես ցույց են տալիս հարցի շուրջ հանրային հարթակում ծավալվող իրադարձությունները` մենք չենք պատվերների ու ֆեյքերի վարպետնները և պետք չէ նրանց իսկ փնտրողից հեռու փնտրել...
Մտածում եմ հիմա. ինչ էլ ջանասեր են զբաղվում մարդասպանին հրեշտակ ներկայացնելու փիառով... և ում է դա պետք. անձնական, թե խմբային շահեր կան այստեղ... իսկ միգուցե այլ...
Մարդասպան Մհերն արդեն սեր ու համերաշխություն գոռալով ու կուրծք ծեծելով է շարունակում մեղանչել Աղաջանովներիս դեմ... Մարդասպան Մհերն է խոսում սիրուց, այն նույն մարդասպանը, ով սպանեց մեր սերը, սպանեց մեր որդուն... համերաշխությունից խոսում է մեկը, ով մինչ օրս հրապարակային ստեր է հրամցնում` մտավորականի ընտանիքիս զրպարտելով ու մեղադրելով տարբեր խարդավանքների մեջ...
Սեր ու համերաշխություն գոռալով չի կարելի սգավոր մարդկանց առջև մեղանչել, սեր գոռալով` սիրող չես դառնա, համերաշխություն գառալով` հանդուրժող... ստոր փորձեր են սրտաճմլիկ հոդվածներ գրելով զոհ երևալը, սպանելուց հետո արդարությունից խոսելը...
Մի օր զղջումի խոսք չարտասանած մարդասպանն է սիրուց խոսում... համերաշխության խրատ տալիս, պետական մակարդակով ներման սպասում...
Մենք քեզ չենք ներել` Աստծուց ներում կհայցես...», - գրել է Միխայիլ Աղաջանովը:
Վերջին օրերին մամուլում հայտնվել են տեղեկություններ, թե դատապարտյալների ներման հանձնաժողովը դրական եզրակացություն է տվել Մհեր Ենոքյանին ներում շնորհելու հարցին: Եթե դա այդպես է, ապա եզրակացությունը պետք է հաստատի ՀՀ նախագահը կամ վարչապետը:
Հիշեցնենք, համաձայն այս դաժան քրեական գործի նյութերի, Իոսիֆ Աղաջանովը առևանգվել է համակուրսեցի Մհեր Ենոքյանի կողմից, որի դիմաց նրա ծնողներից պահանջվել է 20 հազար ԱՄՆ դոլար փրկագին: Սակայն սպանվել է դաժանաբար. նրա մարմինը հայտնաբերել են մաս-մաս կտրատված: Մհեր Ենոքյանը պնդում է, որ ինքը մեղավոր չէ: Կատարվածին մասնակից է եղել նաև նրանց մյուս ընկերը՝ Աշոտ Հարությունյանը, որը 15 տարի պատիժը կրելուց հետո այժմ ազատ է արձակվել: Հարությունյանի ցուցմունքների հիման վրա Մհեր Ենոքյանին սպանության մեղադրանք է առաջադրվել: Վերջինս նախ դատապարտվել է գնդակահարության, սակայն ավելի ուշ գնդակահարման դատապարտվածների նկատմամբ նախագահի որոշմամբ կիրառվում է ցմահ ազատազրկում պատիժ ու, Ենոքյանը 100-ից ավելի ցմահ դատապարտյալներից մեկն է:
