Անտեսում են ԱՄՆ-ին. Հնդկաստանն ու Չինաստանը չեն հրաժարվում իրանական նավթից

Չինաստանը և Հնդկաստանը մտադիր են գնել Իրանում արդյունահանված նավթը՝ չնայած նոյեմբերի 5-ից ուժի մեջ մտնող ամերիկյան նոր պատժամիջոցներին:

Վաշինգտոնը միջազգային համայնքին կոչ է արել նոյեմբերի 5-ից ընդհանրապես դադարեցնել հումքի գնումն Իրանից, սակայն Չինաստանը և Հնդկաստանը հայտնել են, որ շարունակելու են գնումները, քանի որ չունեն անհրաժեշտ քանակով նավթ ձեռք բերելու այլ աղբյուրներ:

Վաշինգտոնը դուրս է եկել Իրանի և վեց տերությունների 2015 թվականի միջուկային պայմանագրից և վերականգնել է ժամանակին սահմանած պատժամիջոցները, հայտնելով, որ դրանք է՛լ ավելի կխստացնի և կընդունի պատժիչ նոր որոշումներ, գրում է Ազատությունը:

Իրանական նավթի հիմնական գնորդներից մեկը համարվող Չինաստանը հայտարարել է, որ չի կարող հրաժարվել գնումներից՝ չնայած ամերիկյան շուկայում բիզնեսն արգելելու մասին Վաշինգտոնի սպառնալիքին:

Մինչդեռ, երկու մյուս խոշոր գնորդները՝ Ճապոնիան և Հարավային Կորեան արդեն հրաժարվել են իրանական նավթից:

Իրանի փոխնախագահ Էսհաք Ջահանգիրին ասել է, թե չի ենթադրում, որ իրանական նավթի օրական վաճառքն իջնի մեկ միլիոն բարել ցուցանիշից, թեպետ, իհարկե, ավելի ցածր կլինի, քան այս տարվա ապրիլին գրանցված ռեկորդային 2․5 միլիոն բարելը:

Չինաստանն Իրանից օրական ստանում է 500 հազարից 800 հազար բարել նավթ: Այդ վառելիքի գինն ամսական կազմում է 1․5 միլիարդ դոլար:

Երկրորդ խոշոր գնորդ Հնդկաստանը հայտարարել է, թե ամերիկյան պատժամիջոցները համարում է միակողմանի, քանի որ դրանք սահմանվել են առանց ՄԱԿ-ի հավանության: