«Փաշինյանի դոկտրինը».ՀՀ–ի արտաքին քաղաքականությունը չի շրջվելու 180 աստիճանով
ՀՀ–ի վարչապետի թեկնածու Նիկոլ Փաշինյանն ԱԺ–ում իր ելույթում անդրադարձավ ՀՀ–ի ապագա արտաքին քաղաքականությանը, ինչն իր մեջ կարևոր մեսիջներ էր պարունակում`ուղղված բոլոր ուժային կենտրոններին։
«Փաշինյանի դոկտրինում»`արտաքին քաղաքական ուղենիշներում ՌԴ–ի հետ ռազմավարական կապերի պահպանումը շարունակում է մնալ առանցքային ու կարևոր`Մոսկվայի հետ բարեկամական կապերը դիտարկվում են, որպես ՀՀ–ի ազգային անվտանգության ապահովման կարևորագույն բաղադրիչներից մեկը։
Փաշինյանը խոսեց ԵԱՏՄ–ում, ՀԱՊԿ–ում ՀՀ–ի մաս կազմելու մասին`այս կազմակերպություններից, ինտեգրացիոն միավորումներից Երևանը դուրս չի գալու։ Չմոռանանք, որ ԵԱՏՄ–ն կարևոր հարթակ է, որտեղ հայկական ապրանքները սպառվում են, ինչը ՀՀ–ի տնտեսության համար լրացուցիչ խթան է։ Ինչ վերաբերվում է ՀԱՊԿ–ին, ապա ՀՀ–ի գտնվելը ՌԴ–ի հետ միասնական ռազմական դաշինքում շատ կարևոր է`ռազմական տեխնիկայի ձեռքբերման ու անվտանգության մակարդակի բարձրացման տեսանկյունից։
Բացի այդ, վարչապետի թեկնածուն խոսեց նաև ԵՄ–ի ու ԱՄՆ–ի`կոլեկտիվ Արևմուտքի հետ կապերի ամրապնդման մասին`Արևմուտքը ՀՀ–ի կարևոր տնտեսական գործընկերն է, ԱՄՆ–ում ու ԵՄ–ի բնակվում են կարևոր հայկական համայնքներ։ Հայաստանյան տնտեսության ակտիվացման համար կարևոր է լինելու նաև եվրոպական ու ամերիկյան ներդրումները, որոնք կցանկանան ռուսական կապիտալին զուգահեռ ներկա լինել հայաստանյան տնտեսությունում։
Հայաստանյան տնտեսությունը պետք է բաց լինի ներդրումների համար`աշխարհի համար բաց լինելու դեպքում միայն հնարավոր կլինի լուծել ՀՀ–ի առջև ծառացած դժվար սոցիալ–տնտեսական խնդիրները, լուծելու մեծ արտաքին պարտքի հարցն ու ստեղծելու աշխատատեղեր`դադարեցնելու համար ՀՀ–ից այդքան վտանգավոր արտագաղթի տեմպերը։
Երևանը պարտավոր է բալանսավորել Արևմուտք–ՌԴ–ի շահերը, համադրել դրանք, այլ ոչ թե հակադրել։ Փաշինյանը շարունակելու է ՀՀ–ի կոմպլիմենտար քաղաքականությունը`շահերի համադրման, այլ ոչ թե հակադրման ճանապարհով`աշխարհի ուժային կենտրոնների հետ բալանսավորված հարաբերությունների կառուցման ճանապարհով։
Փաշինյանի ելույթում շեշտադրվեց նաև ՀՀ–ի անմիջական հարևանների`Վրաստանի ու Իրանի հետ հարաբերությունները նոր որակական մակարդակի բարձրացման մասին`թուրք–ադրբեջանական տանդեմը շատ ակտիվ է վերոնշյալ երկրներում`Թբիլիսիի ու Թեհրանի հետ նոր որակի կապերը`առաջնահերթություն են։ Ելույթում Փաշինյանն անդրադարձ կատարեց նաև գերտերություններից Չինաստանի հետ կապերի խորացման անհրաժեշտությանը։
«Փաշինյանի դոկտրինը» ենթադրում է դիվերսիֆիկացված արտաքին քաղաքականության իրականացում`շեշտը դնելով ավանդական դաշնակցի`ՌԴ–ի հետ բարեկամական կապերի ամրապնդման վրա։ Կարևոր է, որ «թավշյա հեղափոխությունից» հետո ՀՀ–ն իր արտաքին քաղաքականությունում 180%-ով չի փոխելու իր արտաքին քաղաքական ուղենիշները, ինչը շատ վտանգավոր կլիներ ՀՀ–ի համար`տնտեսական, անվտանգության, ղարաբաղյան հարցի առկայության, Թուրքիա–Ադրբեջան տանդեմի առկայության տեսանկյուններից։
