Գիշերը ծեծկռտուք է տեղի ունեցել Մոսկովյան-Բաղրամյան խաչմերուկի հատվածում

Գիշերը ծեծկռտուք է տեղի ունեցել Մոսկովյան-Բաղրամյան խաչմերուկի հատվածում: Այս մասին հայտարարել է Նիկոլ Փաշինյանը։

Ընդդիմադիր պատգամավորը արձանագրել է, որ ցանկացած ոք, ով որևէ պատճառով բռնություն է գործադրում, չի կարող համարվել իրենց ցույցի ու շարժման մասնակից:

«Ոստիկանությունը կամ իշխանությունը կարող է հազար խմած մարդ ուղարկի, ովքեր կգան իրենց լկտի կպահեն, ամենավերջին հայհոյանքները կտան, բայց որևէ պարագայում որևէ բռնություն գործադրողը մեր շարժման մասնակից չի կարող համարվել»,- ասել է նա` ընդգծելով, որ ասել և կրկնում են`բացառում են բռնությունը։

Նշենք, որ մի քանի տասնյակ մարդ գիշերել է Ֆրանսիայի հրապարակում: Հրապարակում են մնացել նաև Նիկոլ Փաշինյանը, Սասուն Միքայելյանը, Արարատ Միրզոյանը և Լենա Նազարյանը: Այս պահին հրապարակում հնչում է երաժշտություն, երիտասարդները շախմատ են խաղում, կարդում, զրուցում. քաղաքացիների հոսքը դեպի այդ հատված ակտիվացել է:

Փակ է շարունակում մնալ Մաշտոցի պողոտա-Մոսկովյան, Բաղրամյան-Մոսկվյան հատվածը, Թումանյան-Մաշտոցի պողոտա խաչմերուկը, Սայաթ-Նովա հատվածը, Հյուսիսային պողոտայի հատվածը։