Թրամփն Իրանի հետ հարաբերություններում «արտակարգ դրությունը» երկարաձգել է

ԱՄՆ նախագահ Դոնալդ Թրամփն Իրանի հետ հարաբերություններում «արտակարգ դրությունը» երկարաձգել է՝ 1979 թվականին Թեհրանում ամերիկյան պատանդների հետ կապված ճգնաժամից հետո: Համապատասխան ծանուցումն ուղարկվել է Կոնգրես:

Նախորդ նախագահները պարբերաբար երկարաձգել են «արտակարգ դրությունը», որն ավարտվում է նոյեմբերի 14-ին: Սակայն Թրամփի որոշումն ընդգծում է իր վարչակազմի եւ Իրանի հարաբերությունների լարվածությունը, գրում է Washington Times- ը:

«Իրանի հետ մեր հարաբերությունները դեռ չեն կարգավորվել, եւ Իրանի հետ 1981 թվականի հունվարի 19-ի համաձայնագրերի իրականացման գործընթացը շարունակվում է», - պաշտոնական ծանուցագրում գրել է Թրամփը:

Խոսքը ԱՄՆ եւ Իրանի միջեւ այսպես կոչված ալժիրյան համաձայնագրերի մասին է, որոնք 1979 թվականին իսլամական հեղափոխությունից հետո Թեհրանում մեկ տարուց ավել պատանդ վերցված ամերիկացի դիվանագետների ազատմանն են հանգեցրել: