«Ելք»-ը ՀՀԿ շտաբի աղբից ընտրակեղծարարության ապացույց է գտել

ԱԺ պատգամավոր, Ելք դաշինքի անդամ Էդմոն Մարուքյանը facebook-յան իր էջում մի փաստաթղթի լուսանկար է հրապարակել՝ նշելով, որ այն գտնվել է Արաբկիրում, ՀՀԿ շտաբից հանված աղբից։

Ըստ Մարուքյանի՝ խոսքը ընտրակաշառք բաժանողի ինստրուկցիայի մասին է:

Հրապարակման տակ արված մենկաբանություններում կան նաև մարդիկ, որ մեղադրում են Մարուքյանին «պրիմիտիվ հնարքների դիմելու» համար: Այսինքն՝  չի կարելի բացառել, որ սա ուղղակի քարոզչական հնարք է:

Այս պահի դրությամբ ՀՀԿ նախընտրական շտաբից որևէ արձագանք չկա:

Մեկ այլ լուսանկարով էլ Մարուքյանը հրապարակել է Պայմանագիրը, «որը կնքում են փող բաժանողի հետ, համաձայն որի X քանակի դեպքում ձայն չբերելու դեպքում գումարը վերադարձվում է»:

Դաշինքից տեղեկացնում են, որ ՀՀԿ շտաբի աղբարկղից հայտնաբերած նյութերը կքննարկվեն այսօր ժամը 20։00-ին ԿԸՀ նիստում։

Հիշեցնենք, Երևանի ավագանու ընտրությունները տեղի կունենան արդեն կիրակի օրը, վաղը լռության օր է: