Պերուն հետաքրքրված է ԵԱՏՄ շրջանակում Հայաստանի հետ հնարավոր համագործակցությամբ

ՀՀ ԱԺ նախագահ Գալուստ Սահակյանը կարևորում է լատինաամերիկյան երկրների հետ սերտ համագործակցության հաստատումը: Այս մասին նա հայտարարել է ՀՀ-ում Պերուի Հանրապետության արտակարգ եւ լիազոր դեսպան Լուիս Բենխամին Չիմոյ Արտեագայի հետ հանդիպմանը:

Գալուստ Սահակյանն ընդգծել է հայ-պերուական հարաբերությունների զարգացման կարեւորությունը միջպետական եւ միջխորհրդարանական մակարդակներում: Անդրադառնալով միջխորհրդարանական հարաբերությունների զարգացմանը՝ խորհրդարանի ղեկավարը կարեւորել է բարեկամական խմբերի նշանակալից ներդրումն այդ գործում եւ հույս հայտնել, որ առաջիկայում երկու երկրների խորհրդարաններում կձեւավորվեն բարեկամական խմբեր:

Գալուստ Սահակյանն իր գոհունակությունն է հայտնել անցյալ տարի Անդյան խորհրդարանի կողմից, որի անդամն է նաեւ Պերուն, Հայոց ցեղասպանությունը ճանաչող եւ դատապարտող բանաձեւի միաձայն ընդունման համար:

Լուիս Բենխամին Չիմոյ Արտեագան իր խոսքում նշել է, որ Պերուն եւ Հայաստանը կայուն ժողովրդավարական երկրներ են, որտեղ խորհրդարանները մեծ դեր ունեն: Պարոն Արտեագան, անդրադառնալով երկու ժողովուրդների ընդհանուր արժեհամակարգին, նշել է, որ Պերուն եւ Հայաստանը կարծես քաղաքակրթության բնօրրան լինեն, եւ անկախ հեռավորությունից՝ պիտի օգտագործեն առկա ներուժը հարաբերությունները սերտացնելու եւ համագործակցությունը զարգացնելու համար:

Նորանշանակ դեսպանը նշել է, որ Պերուն հետաքրքրված է նաեւ ԵԱՏՄ շրջանակում Հայաստանի հետ հնարավոր համագործակցությամբ: