Ողբերգական վթար Արագածոտնում. կա 1 զոհ և 11 վիրավոր

Արագածոտնի մարզում վաղ առավոտյան տեղի ունեցած խոշոր ավտովթարը մեկ մարդու կյանք է խլել, ևս տասնմեկը ստացել են տարբեր աստիճանի մարմնական վնասվածքներ՝ մարդատար միկրոավտոբուսի և բեռնատարի բախման հետևանքով։

Ինչպես հայտնում է shamshyan.com-ը, միջադեպը գրանցվել է այսօր՝ հունիսի 22-ին՝ ժամը 06:00-ի սահմաններում, Գյումրի-Քարակետ միջպետական ավտոճանապարհին՝ Արտենի գյուղի հարակից տարածքում: Ըստ նախնական տեղեկությունների՝ իրար են բախվել ուղևորատար «Գազել»-ն ու «Զիլ» մակնիշի բեռնատարը, ինչի արդյունքում միկրոավտոբուսը դուրս է եկել ճանապարհի երթևեկելի հատվածից և գլխիվայր շրջվել դաշտում:

Վթարի հետևանքով մեկ անձ մահացել է դեպքի վայրում։ Եվս տասնմեկ տուժածներ՝ քաղաքացիների, փրկարարների և շտապօգնության բրիգադների օպերատիվ արձագանքի շնորհիվ, հոսպիտալացվել են Թալինի բժշկական կենտրոն: Անհրաժեշտ առաջին օգնությունը ցուցաբերելուց հետո առավել ծանր վիճակում գտնվող մի քանի հիվանդներ ռեանիմոբիլներով անհապաղ տեղափոխվել են Երևանի մասնագիտացված բժշկական հաստատություններ:

Դեպքի առթիվ Թալինի քննչական բաժնում արդեն իսկ նախաձեռնվել է քրեական վարույթ։ Իրավապահ մարմիններն իրականացնում են համապատասխան գործողություններ՝ վարորդների, տուժածների և զոհվածի ինքնությունը, ինչպես նաև վթարի ստույգ պատճառներն ու հանգամանքները պարզելու նպատակով: