Աննախադեպ տեղումներ Գյումրիում. քաղաքի որոշ հատվածներ դարձել են անանցանելի

Անցած գիշեր Գյումրիում տեղացած անոմալ տեղատարափ անձրևն ու կարկուտը քաղաքում արտակարգ իրավիճակ են ստեղծել։ Ինտենսիվ տեղումների հետևանքով փողոցների մի մասը հայտնվել է ջրի և սառույցի տակ՝ լուրջ խնդիրներ առաջացնելով բնակիչների և տրանսպորտի տեղաշարժի համար։

Այս մասին հայտնում է Գյումրու քաղաքապետարանը։

Առավել բարդ իրավիճակ է ստեղծվել Տերյան փողոցից դեպի Ախուրյան տանող կամրջի տակ. կուտակված հսկայական սառցաշերտի և ջրի պատճառով երթևեկությունն այդ ուղղությամբ ամբողջությամբ կաթվածահարվել է։

Քաղաքապետարանի բնակկոմունալ բաժնի պետի պաշտոնակատար Անդրանիկ Չադրյանի խոսքով՝ տեղումների ծավալն աննախադեպ էր քաղաքի համար։