Իրանը հայտարարել է Նեթանյահուի գրասենյակին հարվածելու մասին

Իսլամական հեղափոխության պահապանների կորպուսը հայտարարել է Իսրայելի վարչապետի նստավայրին հրթիռային հարված հասցնելու մասին: Իսրայելական կողմը հերքում է այդ տեղեկությունը՝ երրորդ օրը շարունակվող լայնածավալ տարածաշրջանային պատերազմի ֆոնին:

Ինչպես հաղորդում են իրանական պետական Tasnim և IRNA գործակալությունները, Իսլամական հեղափոխության պահապանների կորպուսը (ԻՀՊԿ) պնդում է, որ միջին հեռահարության Kheiber բալիստիկ հրթիռներով հարվածներ է հասցրել Իսրայելի կառավարական համալիրին։ Նշվում է, որ հարձակումների տասներորդ ալիքի թիրախ են դարձել Բենիամին Նեթանյահուի գրասենյակը և Իսրայելի ռազմաօդային ուժերի հրամանատարի տեղակայման վայրը: ԻՀՊԿ-ն խոստացել է գործողության արդյունքների վերաբերյալ լրացուցիչ տվյալներ հրապարակել ավելի ուշ:

Արձագանքելով այս հայտարարություններին՝ իսրայելական «12-րդ ալիքի» քաղաքական վերլուծաբան Ամիտ Սեգալը հայտնել է, որ պաշտոնական Երուսաղեմը, շահարկումներից խուսափելու նպատակով, կտրականապես հերքում է նման խոցումների փաստը: Այնուամենայնիվ, լարվածությունը տարածաշրջանում աճում է. վաղ առավոտյան Իրանը հրթիռային արձակումների նոր զանգվածային շարք է սկսել Իսրայելի տարածքի և Մերձավոր Արևելքում տեղակայված ամերիկյան ռազմական օբյեկտների ուղղությամբ։ Իսրայելի պաշտպանության բանակը (ՑԱԽԱԼ) հայտնել է սպառնալիքների չեզոքացման ուղղությամբ ՀՕՊ համակարգերի ակտիվ աշխատանքի մասին: Օդային տագնապ է հայտարարվել Իսրայելի մեծ մասում, իսկ պայթյունների ձայներ են լսվել նաև Քուվեյթում, Քաթարում, Բահրեյնում և ԱՄԷ-ում:

Իրանի, Իսրայելի և ԱՄՆ-ի միջև ինտենսիվ փոխադարձ հարվածները չեն դադարում արդեն երրորդ օրը: Աննախադեպ սրման խթան հանդիսացավ փետրվարի 28-ի հարձակումը, որի ընթացքում ՑԱԽԱԼ-ը հարվածեց Թեհրանում Իրանի Գերագույն առաջնորդի նստավայրին: Դրանից կարճ ժամանակ անց ԱՄՆ նախագահ Դոնալդ Թրամփը պաշտոնապես հաստատեց այաթոլլա Ալի Խամենեիի մահը: Ի պատասխան՝ իրանական ռազմական հրամանատարությունը խոստացել է մեծացնել հարձակումների ուժգնությունը և թույլ չտալ, որպեսզի հակառակորդի տարածքներում և Միացյալ Նահանգների ռազմաբազաներում տագնապի շչակները լռեն: