«Նա շատ ավելի ազատ է, քան մենք». ընդդիմությունը նոր քաղբանտարկյալների անուններ հնչեցրեց

«Հայաստան» խմբակցության պատգամավոր Գեղամ Մանուկյանը սեպտեմբերի 8-ի Ազգային ժողովի նիստի մեկնարկին հայտարարել է, որ իր գործընկեր Արթուր Սարգսյանի պատգամավորական աթոռը թափուր է՝ նրա անօրինական կալանավորման պատճառով։

Ըստ Մանուկյանի՝ Սարգսյանը, ինչպես և մի շարք այլ գործիչներ, այդ թվում՝ Միքայել արքեպիսկոպոսը և «Սրբազան շարժման» կողմնակիցները, քաղաքական հետապնդման են ենթարկվել կեղծ մեղադրանքներով։

Հայաստանի խորհրդարանի նստաշրջանը մեկնարկել է քաղաքական սուր հայտարարությամբ։ Ընդդիմադիր «Հայաստան» խմբակցության պատգամավոր Գեղամ Մանուկյանը հայտարարել է, որ իր գործընկեր Արթուր Սարգսյանի մանդատը թափուր է, քանի որ վերջինս գտնվում է անազատության մեջ՝ «կեղծ մեղադրանքների» հիման վրա։

Մանուկյանը հիշեցրեց, որ Արթուր Սարգսյանը նաև այս գումարման խորհրդարանի աշխատանքի սկզբում էր գտնվում անազատության մեջ՝ իր բնորոշմամբ՝ «դատավորի անօրինական որոշմամբ»։ Ըստ պատգամավորի՝ Սարգսյանն այս տարիներին մնացել է «սկզբունքային և հայրենասեր», ինչի համար էլ ենթարկվել է հետապնդման։

Իր ելույթում ընդդիմադիր գործիչը թվարկեց նաև այլ կալանավորվածների, որոնց համարում է քաղբանտարկյալներ՝ «Սրբազան շարժման» 18 կողմնակիցներին, Միքայել արքեպիսկոպոսին և հասարակական գործիչ Կարեն Կարապետյանին։ Մանուկյանը պնդում է, որ նրանք բոլորը կալանավորվել են «այստեղ դատախազի հրապարակած կեղծ տվյալների» հիման վրա։

Չնայած անազատության մեջ գտնվելուն, ըստ պատգամավորի, Արթուր Սարգսյանը և մյուս կալանավորվածները «շատ ավելի ազատ են», քան ԱԺ դահլիճում ներկա գտնվողներից յուրաքանչյուրը։ «Նրանք պայքարում են երկրի ազատության, արդարության, ժողովրդի իրավունքների վերատիրացման համար», — հայտարարեց Մանուկյանը՝ ողջունելով շարժման բոլոր կալանավորված անդամներին։