Հայաստանի կառավարությունը վերանայել է «Լիդիան Արմենիա»-ի ֆինանսավորման պայմանները

Ապրիլի 30-ին Հայաստանի Հանրապետության կառավարությունը նոր որոշում է ընդունել, որի նպատակն է ապահովել «Լիդիան Արմենիա» ընկերության բնականոն գործունեության շարունակությունը։

Որոշումը հանդիսանում է ընկերության գործունեության աջակցությանն ուղղված միջոցառումների շարունակություն։

Ավելի վաղ՝ փետրվարի 27-ին, գործադիրը որոշել էր տրամադրել մինչև 150 մլն ԱՄՆ դոլարի չափով բյուջետային երաշխիք՝ Հայաստանի բանկային համակարգից մինչև հինգ տարի մարման ժամկետով, մինչև 9% անվանական տոկոսադրույքով վարկային միջոցներ ներգրավելու նպատակով։

Ընկերության և առևտրային բանկերի միջև բանակցությունների արդյունքում փոխվել է վարկատու բանկերի կազմը, ինչի պատճառով անհրաժեշտ էր վերանայել և փոփոխել կառավարության՝ բյուջետային երաշխիք տրամադրելու մասին նախկին որոշման բովանդակությունը։ Այդ պատճառով էլ ներկայիս նախագիծը ներառվել և ընդունվել է գործադիրի նիստում։

Նշվում է, որ նախագծի ընդունումը միտված է ապահովելու «Լիդիան Արմենիա»-ի ֆինանսավորման ընթացիկ գործընթացների կայունությունն ու ընկերության գործառույթների շարունակականությունը։

ՀՀ էկոնոմիկայի նախարարության կողմից իրականացված ուսումնասիրությունները ցույց են տալիս, որ ծրագրի լիարժեք իրականացումը զգալի ազդեցություն կունենա երկրի տնտեսության վրա: Ակնկալվում է, որ հանքի գործունեության ուղղակի և անուղղակի ազդեցությունը տարեկան կավելացնի Հայաստանի ՀՆԱ-ն 1,0-ից 1,5%-ով: Շրագիրն ունի նաև այլ սոցիալ-տնտեսական ազդեցություն. շինարարության փուլում կստեղծվի ավելի քան 1000 աշխատատեղ, իսկ շահագործման ժամանակաշրջանում մշտական աշխատանք կստանան շուրջ 700 մասնագետներ ընկերության տարբեր ստորաբաժանումներում:

Հարկ է նշել, որ երաշխիքի տրամադրումը կմեծացնի երկրի բյուջեի պարտքային բեռը: Կանխատեսումների համաձայն, 2025 թվականին Հայաստանի պետական պարտքն արդեն կգերազանցի օրենքով սահմանված ՀՆԱ-ի 50% շեմը և կհասնի 54,3%-ի: Նախատեսվող երաշխիքի գումարը կկազմի 2025 թվականի համար կանխատեսվող անվանական ՀՆԱ-ի 0,58%-ը:

Երաշխիքի տրամադրման կարևոր պայման է հանդիսանում որոշումն ուժի մեջ մտնելուց հետո վեց ամսվա ընթացքում ընկերության կողմից իր ակտիվների շուկայական գնահատման վերաբերյալ անկախ աուդիտորական կազմակերպության կողմից հաստատված հաշվետվության ներկայացումը:

Ծրագրի հաջող իրականացման դեպքում ակնկալվում է պետական բյուջեի եկամուտների աճ: Սակայն երաշխիքի նյութականացման դեպքում բյուջեի ծախսերը կարող են ավելանալ մինչև 150 միլիոն դոլարի չափով: