Կոնգրեսականները կոչ են արել Ադրբեջանին վերջ տալ Ղարաբաղի դեմ սպառնալիքներին

Միացյալ Նահանգների Կոնգրեսի Ներկայացուցիչների պալատի մի շարք անդամներ դատապարտել են 1988-1990թթ. Ադրբեջանում՝ մասնավորապես Սումգայիթում, Կիրովաբադում ու Բաքվում հայերի դեմ իրականացված ջարդերը: Այս մասին հայտնում է Asbarez-ը՝ հղում անելով ԱՄՆ Հայ դատի հանձնախմբի գրասենյակին:

Հայերի ջարդերը դատապարտող կոնգրեսականների թվում են եղել Բրեդ Շերմանը, Ֆրենք Փալոունը և Ադամ Շիֆը, որոնք ջարդերի անմեղ զոհերի հիշատակը ոգեկոչելուց զատ՝ հույս են հայտնել, որ ապագայում այլևս երբեք նման բան չի կրկնվի:

Նրանք դիմել են Ադրբեջանի ներկայիս իշխանություններին՝ կոչ անելով վերջ տալ Լեռնային Ղարաբաղի դեմ ուղղված բոլոր սպառնալիքներին, սադրանքներին ու հրադադարի ռեժիմի խախտումներին:

«Եթե մենք այսօր չդատապարտենք մարդկության դեմ իրագործված հանցագործությունները և թույլ տանք, որ դրանց պատասխանատուներն անպատիժ մնան, իսկ դեպքերն էլ՝ չճանաչված, պարարտ հող կստեղծենք ապագայում նման հանցանքների կրկնության համար»,-հավելել է Փալոունը: