Կառավարությունը պատերազմ է հայտարարում «հողերի կեղծ» աճուրդներին

Հայաստանի կառավարության նիստում վարչապետ Նիկոլ Փաշինյանը բարձրացրեց համայնքային հողերի վաճառքի ժամանակ չարաշահումների անհանգստացնող հարցը։ Նրա խոսքով, վերջերս ահազանգ է ստացվել, որ համայնքային աճուրդում քառակուսի մետրը 100 դրամով ձեռք բերված հողակտորը երկրորդային շուկայում վերավաճառվում է արդեն 500 դոլարով։

«Ծիծաղելի գներով սեփականության վերաբաշխում է տեղի ունենում, և մենք դրանից նույնիսկ տեղյակ չենք լինում։ Պետք է շատ հրատապ որոշումներ կայացնել», - հայտարարեց կառավարության ղեկավարը։
Վարչապետը նշեց, որ խնդիրը սրվել է միկրոռեգիոնալ փաստաթղթերի ընդունումից հետո, երբ գյուղատնտեսական նշանակության հողերը վերածվում են խառը կառուցապատման հողերի, ինչը էականորեն բարձրացնում է դրանց արժեքը։

Գլխավոր դատախազ Աննա Վարդապետյանը հաստատեց ձևական աճուրդների վերաբերյալ բազմաթիվ հաջողված հայցերի առկայությունը։ Նրա խոսքով, ապացույցների հիման վրա պարզվում է, որ աճուրդներին մասնակցում են ձևական մասնակիցներ, որոնք փոխկապակցված են համայնքների ղեկավարների հետ։
Խնդրի լուծման համար Վարդապետյանն առաջարկեց երեք հիմնական փոփոխություն․ վաճառքը կազմակերպել բացառապես շուկայական գնով աճուրդների միջոցով, ապահովել առևտրի իրական հրապարակայնություն և սահմանել հողերի կատեգորիաներ, որոնք չեն ենթակա օտարման։

Վարչապետը հանձնարարեց Վերահսկողական ծառայության, Ազգային անվտանգության ծառայության և այլ մարմինների միջոցով վերահսկել և կանխել ձևական աճուրդները։ «Որտեղ ծիծաղելի գներով հողեր են դրված վաճառքի, ուղղակի կանգնեցրեք։ Եթե համայնքները չկանգնեցնեն, մենք կոնկրետ... չգիտեմ՝ ոնց կհնչի, բայց մենք այդ համայնքների հետևից ենք ընկնելու», — հայտարարեց Փաշինյանը։

Նա նաև հանձնարարեց Տարածքային կառավարման և ենթակառուցվածքների նախարարության ղեկավարությամբ ստեղծել աշխատանքային խումբ, որը մեկ ամսվա ընթացքում պետք է ներկայացնի խնդրի լուծման առաջարկներ, իսկ մարզպետներին՝ ստուգել և կասեցնել բոլոր ընթացիկ աճուրդները մինչև վերջնական որոշումների մշակումը։