Ադրբեջանն ու ՀՀ-ն կհանեն "Զանգեզուրի միջանցքի" շուրջ քննարկումը Խաղաղության պայմանագրից

Փոխադարձ համաձայնությամբ մենք որոշեցինք հանել այս կետը խաղաղության համաձայնագրից և այն [քննարկումը] տեղափոխել ավելի ուշ փուլ: Այս մասին «Ազատություն» ռադիոկայանին ասել է Ադրբեջանի նախագահի հատուկ հանձնարարությունների գծով ներկայացուցիչ, դեսպան Էլչին Ամիրբեկովը՝ խոսելով այսպես կոչված "Զանգեզուրի միջանցքից":

Ըստ նրա, բանակցությունների ընթացքն այս պահին դյուրացնող գործոններից մեկն այն է, որ երկու կողմերը «համաձայնության են եկել ամենավիճահարույց հարցի շուրջ», այն է՝ ինչպես կազմակերպել տրանսպորտային երթուղիներ, որոնք կմիացնեն Ադրբեջանի մնացած տարածքը Նախիջևանի հետ:

«Ադրբեջանի դեմ տարածքային պահանջները, որոնք ներառված են Հայաստանի գործող սահմանադրության մեջ, մնում են Բաքվի և Երևանի միջև խաղաղ գործընթացում հետագա առաջընթացի միակ խոչընդոտը»,- հավելել է նա: